iklan

DILI, HEADLINE, NASIONÁL

Governu sei solusiona traballadór timoroan na’in-hitu “terus” hela iha Dubai

Governu sei solusiona traballadór timoroan na’in-hitu “terus” hela iha Dubai

Ministru Prezidénsia Konsellu Ministru, Fidelis Manuel Leite Magalhães. Imajen TATOLI/Egas Cristóvão

DILI, 24 juñu 2022 (TATOLI)—Primeiru-Ministru Interinu no Atuál Ministru Prezidénsia Konsellu Ministru (PCM, siglá portugés), Fidelis Manuel Leite Magalhães, hateten Governu fó atensaun boot no sei solusiona traballadór timor-oan na’in-hitu (7) ne’ebé daudaun ne’e terus no hela iha Dubai, Uni Emiradu Arabé (UEA).

Notísia Relevante: PR Horta husu Governu repatria timor-oan na’in-hitu hosi Dubai

“Relasiona ho kondisaun ita-nia traballadór sira iha rai-li’ur no hirak ne’ebé konforme informasaun dehan lori ba iha ne’eba hosi forma dalan ilísita no sujeita ba iha tratamentu ne’ebé mak ladi’ak. Ne’e asuntu hirak ne’ebé hetan atensaun boot hosi Governu no órgaun kompetente. Governu halo hela servisu hodi bele lori solusaun ba problema refere. Ida-ne’e atu bele garante katak ita-nia sidadaun ninia vida protezida no sira labele sai vítima ba atividade ilísita internasionál ne’ebé mak bele lori sai ameasa ba sira-nia moris,” Ministru Fidelis hateten ba jornalista sira hafoin ramata enkontru ho Prezidente Repúblika, José Ramos Horta, iha Palásiu Prezidensiál Nicolau Lobato, Bairru Pite, sesta ne’e.

Tanba ne’e, nia dehan, Governu liuhosi ministériu kompetente hanesan Ministéiru Negósiu Estranjeiru no Kooperasaun (MNEK) haree hela kestaun refere.

Hatán kona-ba lori fila traballadór hirak ne’e, Fidelis hateten Governu iha dever atu halo atuasaun ba nia sidadaun maibé nia parte labele pronunisa uluk tanba kestaun ne’e parte kompetente Governu nian bele trata.

“Governu iha dever atu halo atuasaun ba nia sidadaun maibé agora prematuru ba ita atu ko’alia no komenta ba asuntu ne’e. Bainhira ita-nia Ministéiru Negósiu Estranjeiru no Kooperasaun (MNEK) no órgaun kompetente sira hanesan Ministériu Públiku, Ministériu Justisa ligasaun ho servisu internasionál nian haree hotu asuntu ida-ne’e, ne’ebé ha’u sei proklama ba ita boot (jornalista) sira la nesesáriu. Tanba preokupasaun dever Governu nian mak atu tau matan ba ninia sidadaun iha fatin hotu liu-liu seguransa pesoal,” nia hateten.

Nune’e, Governante ne’e dehan, preokupasaun primeiru mak asegura integridade pesoál konforme sujeita ba tratamentu ladi’ak ba iha indísiu tráfiku ema-nian ida mak tenke sai medida atu hola. 

Notísia Relevante: Timoroan na’in-hitu “terus” hela iha Dubai

Jornalista : Nelson de Sousa

Editór       : Cancio Ximenes

iklan
iklan

Leave a Reply

iklan
error: Content is protected !!