iklan

DESPORTU, DILI, HEADLINE

Problema ho jogadór Brazileiru, estrutura klube deside taka Lalenok United FC

Problema ho jogadór Brazileiru, estrutura klube deside taka Lalenok United FC

Jogadór no estrutura Lalenok United FC festeja vitória ne'ebé sira hetan iha Primeira Divizaun LFA époka 2019. Imajen LFA/Dok

DILI, 27 juñu 2022 (TATOLI) – Bazeia ba reuniaun internál estrutura Klube Futeból Lalenok United FC, iha 23 juñu, deside taka totalmente klube ne’e, hodi la hala’o tan atividade futeból tanba  jogadór Brazilleiru “Italo Pimentel Soares” hato’o keixa ba Federation International Football Association (FIFA) afeta tebes ba dignidade klube ne’e.

“Hafoin tetu ho kle’an hanoin lubuk ida inklu halo konsultasaun internál iha klube laran mak, ha’u nu’udar Prezidente ba klube Lalenok United FC deklara no foti desizaun taka atividade klube hodi rezigna-an hosi atividade futeból iha rai laran no liur ne’ebé organiza hosi Federasaun Futeból Timor-Leste (FFTL) no Liga Futeból Timor-Leste (LFTL),” deklara Prezidente Klube Lalenok United FC, Pedro Belo liuhosi karta ne’ebé hatoo ba FFTL, ne’ebé Agência TATOLI asesu, segunda ne’e.

Iha karta ne’e, Prezidente Klube afirma, desizaun ne’ebé klube foti todan tebes ba lalaok klube nian, tanba husik hela atividade lubuk ida ne’ebé durante ne’e haboot ona naran Lalenok nian iha rai laran no rai li’ur. Klube ne’ebé kampiaun barak liu iha LFTL no prinxe rekezitu barak hodi reprezenta naran Timor-Leste iha jogu Asian Football Confederation (AFC) nian.

“Ami hatene katak, desizaun ne’ebé foti halo adeptu-sira no ema ne’ebé hadomi futeból mosu pergunta boot, tansa Lalenok rezigna-an, liu-liu kontestan klube primeira divizaun no segunda divizaun no balun la fiar, maibé ida ne’e mak realidade klube nian,” refere karta ne’e.

Iha karta ne’e, sita mós asuntu sira ne’ebé prejudika no laiha satisfasaun ba klube hanesan razaun forte hodi rezigna-an no taka permanente hosi liga futeból Timor-Leste mak hanesan;

Dahuluk, Problema jogadór Brazilleiru “Italo Pimentel Soares” ne’ebé afeta tebes ba dignidade klube tanba jogadór ne’e keixa Lalenok ba iha Federation International Football Association (FIFA) no ikus desizaun sai “Klubu tenke selu osan ho montante $7,500.00, hanesan kompensasaun ba jogadór refere. Tanba tuir FIFA, klubu Lalenok la fó salariu ba jogadór ne’e durante pandemia COVID-19 ne’ebé afeta ba mundu tomak inklui atividade futeból iha Timor-Leste paradu total”.

Iha karta FIFA ne’e, haruka klubu tenke selu ho valór $7,500.00 tanba jogadór refere, se lae sei hetan sansaun durante tinan tolu la partisipa iha eventu internasionál no mantein de’it jogadór sira ne’ebé tuan no labele halo transferénsia jogadór sira iha rai laran hanesan sosa no faan inklui mós jogadór estranjeiru.

Daruak, Lalenok seidauk abandona direitu ninian jogadór sira liuliu kestaun finansa (saláriu) tanba iha kontratu ne’ebé jogadór asina mensiona mós katak, bainhira mosu pandemia, dezastre boot, no seluk tan ne’ebé prezudika ba moris ema nian, nasaun nian mak jogadór nasionál no internasionál sei la simu salariu, maibé osan hahan klube sei fasilita nafatin.

Datoluk, kontratu jogadór nian hotu hatama ba iha FFTL, maibé akontese problema FFTL la ajuda no buka solusaun ba problema ne’ebé klube hasoru ho jogadór Italo, no jogadór ne’e rasik mud aba klube seluk (Boavista klube de Timor laiha koinesimentu ba klube Lalenok, maibé too ikus Lalenok mak nafatin sala maibé kontratu hatete momoos).

Dahaat, problema jogadór Italo nian ne’e laos klube mak sala, maibé antes nia mai iha klube iha ona akordu verbal katak nia prezensa atu reforsa Lalenok iha jogu preparasaun ba AFC époka 2021, maibe jogu ne’e kansela tanba pandemia Covid-19 iha momentu ne’ebá. Lolos iha konsiderasaun hosi FFTL tanba klube hasai ona osan barak ba jogadór ne’e too ona mai Timor – Leste ho buat hirak ne’e mak klube foti desizaun taka.

Dalima, jogadór ne’e hatoo keixa ba FFTL nafatin fó sala klubu, tanba ne’e Lalenok la satisfaz ho desizaun ne’ebé foti hosi federasaun iha momentu jogadór ba halo keixa.

Nune’e, hanesan klube respeita nafatin desizaun ne’ebé tun ona, maski todan, maibé ne’e realidade ne’ebé klube tenke simu. “Lalenok laiha osan atu selu Italo tuir saida mak FIFA hatun ona tuir sira nia hanoin, la hare ba difikuldade saida mak klube enfrenta iha pandemia ne’ebé mundu enfrenta, klube enfrenta no ida ne’e mak realidade ne’ebé klube tenke simu.”

“Ho fuan boot ida ne’e mak desizaun finál klube nian taka nia atividade  no rezigna-an hosi atividade futeból Timor-Leste ne’ebé durante ne’e haboot ona naran Lalenok,” refere tan hosi karta ne’e.

LFTL sente triste

Ho desisaun Lalenok United FC nian, Liga Futeból Timor – Leste (LFTL) ne’ebé simu mós karta ne’e sente triste tanba lakon klube di’ak ida ne’ebé durante ne’e kampiaun barak liu iha liga no reprezenta Timor-Leste ba joga ona iha AFC 2020.

“Ami liga sente triste tanba klube famozu hanesan Lalenok taka ona sira nia atividade, ida ne’e prejudika mós ba jogadór sira ne’ebé dadauk ne’e iha hela Lalenok,” Diretor Relasaun Públika LFTL, Diogo Neto Fraga, hateten ba Agência TATOLI.

Kona-ba jogadór Lalenok nian sei la joga iha époka ne’e, LFTL sei buka meiu hotu atu nune’e labele halo talentu jogadór-sira nian lakon.

“Ami sei tur hamutuk ho FFTL atu hare desizaun sira ne’ebé iha labele prejudika jogadór-sira,  maibé so prejudika de’it mak klube. Ami buka meiu atu bele utiliza jogadór sira ba iha klube seluk ne’ebé eziste hela,” nia afirma.

Lalelok harii iha 2016  

Lalenok United FC harii iha tinan 2016, hosi Pedro Belo no nia eis espoza Zenilda Gusmõ no hahú kompete iha Liga Futeból Amadora (LFA) iha 2017 hanesan klube terseira divizaun.

Nune’e, iha 2018 klube ne’e promove ba segunda divizaun, iha tinan ida de’it klube ne’e ultrapasa liu ba primeira divizaun iha 2019 konsege sai kedan kampiaun ba LFA.

La’ós ne’e de’it nia mós sai kedan kampiaun ba kopa 12 de Novembru 2019 no super tasa 2019, iha 2020 Lalenok mantein nia titulu hanesan ekipa ne’ebé kampiaun dala rua tutuir malu ba LFA, Kopa 12 de Novembru, Super Tasa no Kopa Federasaun Futeból Timor-Leste (FFTL).

Totál jogadór ne’ebé hamutuk hela ho Lalenok hamutuk na’in-21 mak hanesan, Elias Mesquita, Francisco da Cotsa, Herminio de Sousa, Lorenço Paulo Freitas, Paulo Gally Freitas, Santiago Xavier Jode da Costa, Yohanes Kapitan Paulus Gusmão, Zacarias Carlos Cabral, Daniel Adadi hosi Ghana, Godwin Adika hosi Ghana, Daniel Appiah hosi Ghana, Patrick Berko hosi Ghana, Emmanuel Etim hosi Nigeria, Helder Valente, Delcio Pereira, Pedro Paulo Vicente, José de Andrade, Joselito de Jesus, Rivaldo Correia no Anizio Monteiro Boavida.

Jornalista: Hortencio Sanchez

Editór     : Florencio Miranda Ximenes

iklan
iklan

2 Comments

  1. Ida ne hatudu katak durante ne ita nunka seriu atu hari klube maibe ita depende los deit ba kampiaun atu nune bele hetan osan uitoan mas labuat ida maibe labele taka klube sebele fan fila fali saham ne ba ema seluk ho naran lalenok nafatin. Tanba lalenok nia kompetisaun laos iha deit Timor laran maibe AFC mos konhese tia ona . Forca Lalenok Uneted

    • Atu harii klubo ida sai sucesso mak tenki kumpri faktor principal rua, mak: Faktor bakat no faktor bisnis.
      Faktor rua nee tenki lao hanesan.
      Laiha ema ida harii klubo para atu lakon osan. Osan sai ba clubo nee normal maibe tenki iha moa fonte ida nebe hatama fali osan (bisnis).

      Jogador sira mos hanesan, atu jogador ida sai profisional tenki kumpri mos faktor principal rua, mak hanesan: faktor bakat no faktor profesi.
      Jogador sira iha ona bakat atu joga, maibe tenki konsidera katak jogador hanesan profesi ida ba nia, para nia bele simu salario nebe merece tuir nia dedikasaun.

      Hau hanoin LFTL no FFTL fo premio ba primeira divizaun ho montante osan $10000 nee demasiado kiik. Depois liga mos loke la reguler, huuppss. Araska

Leave a Reply

iklan
error: Content is protected !!