DILI, 28 juñu 2022 (TATOLI)— Ministériu Públiku (MP) husu ba Tribunál Distritál Dili (TDD), atu aplika medida koasaun Prizaun Preventiva ba arguidu na’in-rua, nu’udar sidadaun estranjeiru tanba iha indísiu forte sira nia-envolvimentu ba kazu tráfiku umanu.
Iha audénsia primeiru interrogatóriu ne’e, alegasaun MP ne’e fundamenta ba aktu arguidu na’in-rua ho insiál ASG no IGAE, ne’ebé envolve iha sindikatu tráfiku umanu no asosiasaun kriminozu hodi trata no fasilita dokumentu ilegál ba trabaladora na’in-hitu, ne’ebé daudaun “terus” hela iha Dubai-Uni Emiradu Árabe.
Notísia relevante: PCIC detein sidadaun estranjeiru na’in-rua ba kazu tráfiku
Nune’e, MP akuza arguidu na’in-rua ho pratika krime tráfiku umanu iha artigu 163 no asosiasaun kriminoza iha artigu 188 hosi kódigu penál Timor-Leste.
“Ministériu Públiku husu tribunál atu aplika medida koasaun Prizaun preventiva ba arguidu estranjeiru nain-rua ne’e, tanba iha indísiu forte katak arguidu nain-rua ne’e envolve duni krime tráfiku umanu,” refere alegasaun MP ne’ebé hato’o hosi Prokuradór Domingos Gouveia, iha sala julgamentu TDD, tersa ne’e.
Maibé, parte Defeza ne’ebé reprezenta hosi Advogadu Privadu, Pedro Apariçio, husu ba tribunál atu absolve arguidu nain-rua hosi krime tráfiku umanu tanba laiha indísiu forte ba envolvimentu hosi arguidu na’in-rua ne’e.
“Ha’u nia parte hanesan Defeza ba arguidu nain rua, husu Tribunál absolve arguidu nain-rua ne’e, tanba faktu sira la komprova no laiha indísiu ba arguidu nain-rua ne’e envolve iha kazu tráfiku umanu,” Advogadu Privadu Pedro Apariçio.
Hafoin alegasaun, Juis singular, Alvaro Maria Freitas deside adia julgamentu hodi fó sai desizaun iha kuarta (29/06), tuku 10:00, dader.
Audénsia julgamentu ne’e prezide hosi Juiz singular, Alvaro Maria Freitas, Ministériu Públiku reprezenta hosi Prokuradór, Domigos Gouveia no Arguidu sira hetan asisténsia hosi Advogadu Privadu, Pedro Apariçio.
Notísia relevante: Tribunál aplika TIR ba arguidu kazu tráfiku umanu
Jornalista: Natalino Costa
Editór : Florencio Miranda Ximenes
