iklan

DESPORTU, DILI, HEADLINE

FATL: atleta Manuel Belo hetan bolsa estudu tanba prenxe kritéria

FATL: atleta Manuel Belo hetan bolsa estudu tanba prenxe kritéria

Prezidente Federasaun Atletizmu Timor – Leste, Afrânio Xavier Amaral. Imjen Tatoli/Dok

DILI, 28 juñu 2022 (TATOLI)— Prezidente Federasaun Atletizmu Timor-Leste (FATL), Afranio Xavier Amaral, informa atleta Manuel Belo Amaral Ataide, hetan bolsa estudu ba Portugál tanba prenxe kritéria liuhosi nia-prestasaun ne’ebé hatudu iha eventu internasionál no nasionál

“Atu klarifika de’it katak, prosesu atu define atleta Manuel hetan bolsa estudu ne’e, la’ós fasil tanba haree ba rekezitu ka kritéria ne’ebé atleta ne’e iha.  Atleta ne’e nia prestasaun hahú kedan iha 2019 no selesaun ba bolsa ne’e hahú kedan hosi 2021,” Prezidente Afrânio, hateten ba Agência TATOLI iha jináziu Dili, tersa ne’e.

Atleta Manuel hetan bolsa bá Portugál, durante tinan rua, tanba prenxe kritériu hanesan iha tinan 2014 atleta ne’e ofrese medalla osan metan ida iha ASEAN Pra-kualifikasaun,  no iha tinan 2018 konsege hetan osan metan rua iha eventu internasionál Atletizmu iha Bankok Tailándia.

Iha 2019 atleta ofrese tan medalla osan metan ida, tanba terseiru lugar iha jogu ASEAN Games no iha tinan 2021 konsege oferese medalla osan metan ida iha kompetisaun ASEAN Games.

Enkuantu, iha kampionatu nasionál atletizmu  hahú 2019 to’o 2020, atleta Manuel mak domina hotu ho prestasaun di’ak.

Ho prestasaun hirak ne’e, nia dehan iha fulan marsu, kada tinan FATL halo relatóriu hodi submete ba International Atletico Association (IAA) hodi hatama atleta Manuel iha Sistema internasionál atletizmu nian.

“Alteta Felisberto nia prestasaun hetan medalla osan mutin rua ne’e akontese iha maiu 2022, enkuantu programa bolsa ne’e hahú kedan iha janeiru 2021 no Manuel nia naran tama iha sistema la mosu mean ka error ho ida ne’e IAA iha aseitasaun kona-ba atleta ne’e, ho nune’e atomatika ona sei labele troka naran ne’ebé durante ne’e submete ona,” nia klarifika.

Nune’e, Prezidente FATL ne’e, rejeita informasaun ne’ebé espalla iha media sosiál katak nia-parte mak trava Atleta Felisberto de Deus ne’ebé  hatudu prestasaun di’ak iha SEA Games 2021 iha Vietname hodi oferese medalla osan mutin ba Timor-Leste.

“Sira dehan ha’u mak trava Felisberto, maibé sira lakohi akompaña no buka hatene prosesu ne’e oinsá. Tanba programa bolsa ne’e hahú halo selesaun iha janeiru 2021, enkuantu atleta Felisberto foin mak hetan prestasaun iha 2022,” nia esplika.

Nia hatutan, “Ami haree no tetu hotu Atleta Manuel iha kondisaun, la’ós de’it nia prestasaun, maibé haree atleta ne’e reprezenta duni Timor-Leste no haree nia biometrika no nia postura isin tenke aas, mak ita hili nia,” Prezidente ne’e afirma.

Daudaun ne’e, FATL hahú prepara altleta Felisberto bá partisipa SEA Games tinan oin (2023) iha Kamboja, ASEAN Games iha Xina no ASEAN University Games iha Tailándia.

Hahú hosi Timor -Leste hetan nia independénsia iha 2002 too agora modalidade ne’ebé oferese medalla barak liu ba nasaun iha eventu internasionál mak atletizmu ho medulla hamutuk 10-resin.

Tanba ne’e, Atletizmu tama iha kritéria ka rekezitu ida ne’ebé prinse kritéria tuir Dekretu-Lei númeru 40/2020 hodi asesu ba fasilidade públika saida de’it.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!