iklan

DILI, HEADLINE, NASIONÁL

Saudozu Sabalae no Metan sakrifika vida hodi defende lia-loos

Saudozu Sabalae no Metan sakrifika vida hodi defende lia-loos

Saudozu Sabalae no Metan. Imajen/Espesiál

DILI, 30 juñu 2021 (TATOLI)- Família Saudozu Pedro Nunes ‘Kery Laran Sabalae’ no Remigio Levi da Costa Tilman ‘Metan ka Irak’, selebra misa eukaristia hodi hanoin-hikas tinan lakon no mate ba-dala 27.

Iha Misa Eukaristia ne’e, Padre selebrante Juvito do Rego, hateten Saudozu Sabalae no Metan nia mate tanba defende lia-loos ho objetivu atu liberta pátria ka ukun rasik-an.


Padre selebrante Juvito do Rego,halo omília durante misa eukaristia hanoin hikas loron mate Saudozu Sabalae no Metan, iha Igreja Balide-Dili. Imajen/Florencio Miranda Ximenes.

“Ita hamutuk harohan ba Maromak, atu saudozu na’in-rua (Sabalae no Metan) bele hetan reinu lalehan, tanba sira sakrifika vida hamutuk ho Saudozu seluk mak ita hetan ukun rasik-an,” Amu Juvito, hateten iha ninian omília durante atividade eklesiastika eukaristia iha Igreja Paróku Katedrál Dili, kinta ne’e.

Amu Juvito husu ba família Saudozu atu hahú korre-an hosi tanis hodi hasa’e orasaun liuhosi misa Eukaristia, atu eroi Sabalae no Metan bele hetan reinu lalehan hodi fó grasa moris ba família no país ne’e.

Notísia relevante: “Keri Laran Sabalae” Nia Istória Luta

Sekretáriu Conselho Executivo da Luta da Frente Clandestina (CEL/FC), Kery Laran Sabalae, ho naran sarani Pedro Nunes hamutuk ho ninian asistente Metan nia lakon, hanesan parte ida hosi prosesu defende lia-loos.

Tanba ne’e, Padre Juvito husu ba líderansa nasionál no ukun na’in ira atu hametin unidade hodi liberta povu hosi ki’ak no mukit tuir mehi erói sira nian.

“Ita husu ba Maramok no eroi sira atu kontinua fó grasa ba ita hotu ne’ebé sei moris atu hatutan sira-nia mehi hodi liberta povu,” Amu harohan.


Família Saudozu Sabalae no Metan tau ai-funan iha Cruz boot, Santa Cruz, Dili. Imajen TATOLI/Florêncio Miranda Ximenes

Eroi sira ne’ebé luta no fó an ba mate tanba hakarak Timor-Leste hetan nia indepedénsia hosi okupasaun Indonézia.

Kery Laran Sabalae no Metan lakon no mate iha loron 29 juñu 1995, bainhira fila hosi Ermera kuandu hala’o hela misaun luta ba ukun rasik-an.

Saudozu Keri Laran Sabalae moris iha kn’ua Susuara, Aldeia Iralafai, Lospalos, Lautém,  iha loron 22 outubru 1955, hanesan oan hosi Lucas Nunes no Felicidade Nunes, maun alin hamutuk na’in-ualu, no hosi sira ne’e mak Duarte Nunes (atuál Prezidente Bankada CNRT iha Parlamentu Nasionál), Victór Nunes, Amelio Nunes no Elsa Nunes no seluk tan.

Enkuantu, Saudozu Remigio Levi da Costa Tilman ou kuñesidu ho naran funu ‘Metan ka Irak’, moris iha Uaibobo, Ossu, Viqueque, iha loron 17 agustu 1974, nia-mate la husik hela ain-fatin ruma ba família no nia kompañeiru da luta luta sira.

Remigio nu’udar oan daruak hosi Eduardo de Araújo Tilman no Luciana da Costa Silva Tilman, iha maun-alin hamutuk na’in-11, mane na’in-sia no feto na’in-rua no hosi maun-alin hirak ne’e, agora hela sira na’in-sia, na’in rua mak fila ona ba mundu seluk.

Hafoin Misa Eukaristia ne’e, família eroi na’in-rua bá sunu lilin no tau ai-funan iha rate Santa Cruz, Dili.

Notísia relevante: Istória mak Dignifika Eroi Sira nian Luta

Jornalista  : Florêncio Miranda Ximenes

Editór          : Rafy Belo

iklan
iklan

Leave a Reply

iklan
error: Content is protected !!