iklan

HEADLINE, MUNISÍPIU, VIQUEQUE

Autoridade husu apoiu emerjénsia ba afetadu inundasaun 92 iha Uatucarbau

Autoridade husu apoiu emerjénsia ba afetadu inundasaun 92 iha Uatucarbau

Xefe suku Uani-uma, António de Jesus. Imajen Tatoli/Vitorino Lopes da Costa

VIQUEQUE, 01 jullu 2022 (TATOLI)—Autoridade suku husu Protesaun Silvil fó apoia emerjénsia ba vítima afetadu dezastre naturál iha aldeia Ossomali, Uatubiloli no Udo, suku Uani-uma, postu administrativu Uatucarbau, ho totál uma-kain hamutuk 92.

Iha loron kuarta (29/06) to’o kinta (30/06) akontese udan-boot no bee sa’e hodi sobu komunidadesira- nia uma no sasán uma-laran.

“Dadús afetadu dezastre narurál iha suku Uani-uma ne’ebé ekipa rekolla hamutuk 92. Husu Protesaun Sivil mai fó apoia emerjénsia ruma tanba ha’u haree afetadu sira presiza apoiu. Tanba ne’e presiza apoiu emerjénsia hodi tulun sira iha situsaun ida-ne’e,” Xefe suku Uani-uma, António de Jesus, informa ba Agência Tatoli, via telefónka, sesta ne’e.

Notísia relevante: Cruz Vermella Viqueque apoia emerjénsia vítima inundasaun iha Viqueque vila

Nia konta tuir, akontesimentu inundasaun ne’e halo komunidade balun la konsege lori sai sira-nia sasán tanba bee mai ho velosidade maka’as hodi rezulta bee sobu uma no lori mós komunidade sira-nia animál.

“Ami haree akontesemetu iha kuarta ne’e la afeta ba komunidade, maibé sasán sira maka hetan estragu barak,” nia akresenta.

Nune’e, nia husu órgaun kompetente hodi foti medida ruma hodi normaliza bee dalan sira ne’ebé tama komunidade sira-nian uma.

“Família afetadu balun to’o agora taho sei nakonu iha sira-nia uma. Tanba ne’e, Estadu presiza buka dalan hodi responde,” nia tenik.

Jornalista   : Vitorino Lopes da Costa

Editora       : Julia Chatarina

iklan
iklan

Leave a Reply

iklan
error: Content is protected !!