iklan

DESPORTU, DILI, HEADLINE

Klube Assalam FC selebra ona kontratu ho Paulo Gally

Klube Assalam FC selebra ona kontratu ho Paulo Gally

Jogadór Timor-Leste, Paulo Gally halo kontra no atake hodi hamonu jogadór Thailandia nian iha jogu AFF 2021 ne'ebé hala’o iha Singapura foin lalais ne'e. imajen/Espesiál

DILI, 04 jullu 2022 (TATOLI) –Prezidente Assalam FC Ipolito Soares hateten, jogadór selesaun nasionál U-23 Timor – Leste hanesan mós eis jogadór Lalenok United FC, Paulo Gally Freitas selebra ona kontratu ho klube ne’ebé nia lidera.

“Loos duni, Gally ho ami aseita malu ona, époka ne’e nia mai joga ho ami, kontratu asina ona, tuir tempu liga nian tinan ida. Ami sei fó tuir ne’e,” dehan Prezidente ne’e ba Jornalista-sira iha kampo FFTL Dili, segunda ne’e.

Paulo Gally Freitas. Imajen Mídia AFF

Nia dehan, maioria jogadór Lalenok nian 50% mak sira fó ona kontratu atu reforsa ho Assalam iha époka ne’e.

“Jogadór Lalenok nian 50% mak ami fó ona kontratu, inklui  Jogadór hosi nasaun Gana na’in-haat, hanesan Daniel Adadi, Nathaniel Agbozo, Emmanuel Godwin no Godwin Adika no timoroan balu tan,” dehan prezidente ne’e.

Prezidente ne’e hatutan ho jogadór ne’ebé iha fó esperansa no garante sai kampiaun Liga Futeból Timor-Leste (LFTL) époka ne’e.

“Ami nia tarjetu mak tinan ne’e tenke kampiaun, ami nia jogadór agora dadaun besik ona 20 no sei rekruta tan,” nia dehan.

Elias Mesquita “triste” estrutura  deside taka Lalelok

Iha fatin ketak, Avansadu Prinsipál klube primeira divizaun Lalenok United FC, Elias Mesquita, sente “triste” bainhira klube ne’ebé nia hadomi taka no la partisipa iha eventu ne’ebé organiza hosi Liga Futeból Timor-Leste (LFTL) no Federasaun Futeból Timor – Leste (FFTL).

Avansadu Prinsipál klube primeira divizaun Lalenok United FC, Elias Mesquita. Imajen/espesial.

“Hanesan jogadór ne’ebé hamutuk kle’ur ho Lalenok sente triste bainhira klube na’in deside taka ona klube, maibé ida ne’e desizaun sira nian. Ami pronto simu realidade,” Elias afirma.

Daudaun ne’e iha ona klube tolu mak kontaktu ona nia atu selebra kontratu, maibé nia sei tetu situasaun hotu no seidauk iha desizaun klaru atu hamutuk ho klube ne’ebé.

“Klube tolu hanesan ne’e mak kontaktu ona ha’u, maibé ha’u seidauk bele foti desizaun, maibé iha tempu besik mak ha’u foti desizaun atu hamutuk ho klube ne’ebé, klube sira ne’e ha’u labele fó sai lai sira nia naran,” nia dehan.

Elias hanesan jogadór Lalenok nian ne’ebé seniór, bainhira klube eziste iha 2016, nia-hamutuk kedan ho Lalenok iha terseira divizaun Liga Futeból Amadora (LFA) ne’ebé seidauk transforma naran ba LFTL.

Bainhira kompete iha terseira divizaun Elias susesu ho nia kolega sira lori klube ne’e promove kedan ba segunda divizaun iha 2017.

Kompete iha segunda divizaun 2018 klube ne’e sai kedan kampiaun ultrapasa ba primeira divizaun iha 2019 no compete iha tempu ne’ebá Lalenok hanesan klube ne’ebé forte no sai kedan kampiaun.

Jogadór selesaun nasionál U-23 ne’e konsege lori Lalenok kampiaun dala rua tutuir malu iha LFTL iha tinan 2019-2020, kampiaun dala rua tutuir malu ba tasa 12 de Novembru iha 2019-2020 no kampiaun ba kopa FFTL 2020.

Ho nune’e hamutuk ho Lalenok jogadór Baucau oan ne’e konsege ofrese troféu lima ba Lalenok too klube ne’e taka iha 2022.

Notísia relevante: Problema ho jogadór Brazileiru, estrutura klube deside taka Lalenok United FC

Jornalista: Hortencio Sanchez

Editór      :   Florencio Miranda Ximenes

iklan
iklan

Leave a Reply

iklan
error: Content is protected !!