DILI, 05 jullu 2022 (TATOLI)— Governu Timor-Leste liuhosi reprezentante Embaixada iha Timor Leste, Kazumi YAMADA, hateten Japaun iha komitementu atu kontinua hametin kooperasaun ho Estadu Timor-Leste iha área saida de’it liuliu seguransa no protesaun marítima.
“Japaun no Timor-Leste iha similaridade barak. Ita nia nasaun nia naran “nasaun lorosa’e”, nasaun ne’ebé kompostu husi illa sira, importánsia husi etu iha ita nia hahan loron-loron nian, no seluk tan. Ita partilla mós valor sira hanesan demokrásia, Liberdade, ekonomia merkadu, no ikus liu mas la menus importante mak Estadu Direitu,” Embaixadór ne’e, hateten liuhosi komunikadu ne’ebé Agência TATOLI asesu, tersa ne’e.
Diplomata Japaun ne’e, hato’o kompromisu ne’e, iha okaziaun entrega meze interativu ba Komponente Navál, FALINTIL-Forsa Defeza Timor-Leste (F-FDTL) iha Hera, segunda ne’e.
“Ha’u labele emphatiza demais importansia hosi Estadu de direitu iha tasi nian ba nasaun illa sira hanesan Japaun no Timor-Leste. Ha’u hakarak atu foti oportunidade ida ne’e hodi reitera hikas komitementu hosi Governu Japaun ba kooperasaun ho Governu Timor-Leste hodi kontribui ba seguransa no protesaun iha rejiaun no alkansa Indo-Pasífiku livre no abertu,” Diplomata Japaun ne’e kompromete.
Konsiénsia Domíniu Marítimu (MDA/Maritime Domain Awareness) mak elementu xave ida ba segurança no protesaun marítima.
Tanba ne’e, nia dehan liuhosi apoia meza interativa ka Interactive Table ne’ebé mak entrega ne’e, nu’udar parte ida husi apoiu UNODC ka Global Maritime Crime Programme ne’ebé finansia hosi Governu Japaun hodi oferese ba ajénsia seguransa marítima sira iha Timor-Leste. Ekipamentu ne’ebé presiza hodi haluan sira nia kuadru operasional marítima.
“Ida ne’e sei ajuda sira hodi movimentu roo no identifika suspeitu iha área tasi nian, ne’ebé mak sei kontribui ba seguransa no protesaun iha rejiaun ne’e,” refere nota ne’e.
Japaun mós apresia dedikasaun husi COMAR hodi avansa kontinuamente seguransa marítima konjunta liuhosi implementasaun teknolójia foun.
“Ami fiar metin katak meja interativa ne’e sei sai prioridade ba jestaun efisiente domíniu marítimu, liuhusi koordenasaun ho parseiru internasionál sira,” refere nota ne’e.
Tinan ida ne’e, marka tinan 20 ba Aniversáriu Restaurasaun Independensia, nune’e mós estabelesimentu relasaun diplomátiku entre nasaun rua.
Nune’, Japaun prontu ajuda Timor-Leste ninia esforsu ba dezenvolvimentu, inklui mós hodi kontinua no haree rezultadu iha diskusaun sira ne’ebé la’o hela kona-ba seguransa no protesaun marítima.
Jornalista: Hortencio Sanchez
Editór : Florencio Miranda Ximenes
