COVALIMA, 06 jullu 2022 (TATOLI)-Diretór Programa Dezenvolvimentu Integradu Munisipal (PDIM), Afonso Nuguira Nahak, hateten kompañia haat maka daudaun ne’e tuir hela konkursu final atu konkore ba projetu konstrusaun irrigasaun Beigu iha suku Lepo, postu administrativu Zumalai, munisípiu Covalima.
Antes ne’e, iha kompañia 21 maka hatama aplikasaun hodi partisipa iha konkorsu públiku maibé ekipa selesaun ho servisu aprovizionamentu PDIM, hili kompañia sia (9) maka admitidu ho kategoria A iha kompañia haat no kategoria B iha kompania lima.
Notísia Relevante :Presiza reabilita irrigasaun-sira iha Covalima
No ikus komisaun deside hili kompañia 4 ho kategoria A maka kontinua iha tama iha konkursu finál. Kompañia haat ne’e mak Jeles Brasis Moris Unipesoál LDA, Joecamor Unipesoál LDA, Sadat Unipesoál LDA no Jino Lindit Unipesoál LDA.
“Ita halo ona pre-kualifikasaun ba kompañia 21 mak konkere dokumentu kompañia 9 mak admitidu hosi númeru ne’e kompañia haat ba kategória A kompañia lima ba kategória B,” nia hateten.
Projetu konstrusaun irigasaun ho naruk killometru ida ka metru 1000 ho ninia montante orsamentu hamutuk $ 89,406.
“Ita mós iha projetu adisionál maske la iha orsamentu kapitál dezenvolvimentu, maibé ita iha projetu kiik ida projetu konstrusaun knaal irigasaun Beigu iha suku Fatuleto postu administrativu Zumalai,” Afonso Nuguira Nahak hateten ba Tatoli, iha ninia servisu fatin, kuarta ne’e.
Daudaun ne’e, nia esplika servisu aprovizionamentu ho ekipa hala’o hela avaliasaun ba dokumentus husi kompañia haat ne’e priense kriteria atu manán projetu ne’e, tanba tuir planu projetu kontrusaun ba irrigasaun ne’e sei komesa iha ínisiu fulan-agostu 2022.
“Ita hein kompania kaer obra ne’e nia tenke finaliza obra ne’e iha fulan haat no fulan-agostu to’o novembru nia tenke remata tanba fulan-dezembru agrikultór sira hahú halai natar ba epoka primeiru,”Diretór ne’e dehan.
Nia dehan projetu ne’e la uza orsamentu husi kapitál dezenvolvimentu tinan fiscal 2022, maibé uza orsamentu restu husi projetu konstrusaun edifisiu postu administrativu Maucatar no rezidénsia administradór munisípiu Covalima nian.
Entertantu, iha loron 15 fulan-marsu 2022 liubá, Diretór Servisu Agrikultura Munisípiu, Covalima, Domingos Gusmão, informa irigasaun Beigu sei distribui bee ba natar hamutuk ektare 190.
Tuir dadus husi Diresaun Agrikultura Munisipal Covalima katak persiza reabilita irrigasaun hamutuk 14 ho fazeadamente tanba postu administrativu Zumalai no Suai potensiál ba natar.
Notísia Relevante :Irrigasaun Maliana II la funsiona, Natar Soso nakonu ho fatuk no rai-henek
Jornalista: Celestina Teles
Editór: Agapito dos Santos
