ERMERA, 09 jullu 2022 (TATOLI)—Primeiru-Ministru (PM), Taur Matan Ruak, husu ba komunidade Ermera hodi kolabora di’ak ho Governu, nune’e bele aselera dezenvolvimentu iha munisípiu Ermera.
“Ministériu Obra Públika (MOP) deside ona kompañia atu halo reabilitasaun estrada suku Fatubesi, postu aministrativu Hatulia, maibé komunidade maka ladún koopera, tanba ne’e to’o agora estrada Fatubesi kontinua a’at. Ha’u orienta ona MOP hodi ko’alia ho komunidade hodi koopera ho Governu tanba hakarak hadi’a estrada ne’e, se lakohi kompañia sei la hadi’a, husik hanesan ne’e, ita bá fali suku ne’ebé maka presiza dezenvolvimentu,” PM Taur hateten durante diálogu komunitáriu, iha Gleno, Ermera, sábadu ne’e.
Notísia relevante: Governu planeia define folin kafé
Nia dehan, estrada hosi Gleno bá Letefoho no hosi Letefoho bá Fatubelico, munisípiu Ainaro no hosi Fatubelico ba Aitutu, munisípiu Same seidauk hadi’a tanba iha problema ho komunidade.
“Komunidade la fó ema tesi sira-nia kafé. Ita loloos atu hadi’a estrada ne’e, maibé tanba problema barak, maka ita seidauk bele halo, maibé ha’u espera tempu badak ita sei rezolve iha área ne’ebá,” Xefe Governu akresenta.
PM refere ba estrada hosi Maliana bá suku Altolebos no bá postu administrativu Fatululik, munsípiu Covalima, hosi Fatululik bá Fohorem, no Fatumea bá Tiliomar to’o tempu ida sei hadi’a.
“Ha’u hanoin tinan-haat ka lima ita-boot sira kuandu hatene filafali ba kotuk dala ruma ita-nia estrada di’ak ona,” nia fó hanoin.
Estrada Batugade to’o Lospalos no estrada hosi Baucau bá Viqueque, tinan ida tan Governu finaliza ona obra, ne’ebé sei hanesan estrada Dili bá Baucau no Dili bá Batugade.
Enkuantu, estrada Manatuto bá Natarbora finaliza ona no daudaun Govenu halo hela estudu atu hadi’a dalan hosi Lospalos ba postu administrativu Iliomar, no estrada hosi Iliomar bá postu administrativu Uatucarbau no Uatuliari.
“Hosi postu administrativu Uatulari bá munisípiu Viqueque no Viqueque bá Luca, neneik sei rezove tanba daudaun ne’e Governu halo ona estudu ba ida-ne’e. Estrada Dili bá Ainaro falta de’it pedasuk, kuandu hadi’a ona, Governu sei avansa fali hodi hadi’a estrada ida hosi Manleuana bá Aileu,” nia akresenta.
Kona-ba eletrisidade, Xefe Governu orienta ona MOP atu finaliza ona prosesu intalasaun liña eletrisidade ba suku 452.
“Aldeia sira ne’ebé seidauk asesu no difisil eletrisidade atu tama, Governu sei fahe painél solár ba komunidade,” nia salienta.
Iha sorin seluk, ba área edukasaun, Governu prevee millaun $25 iha Orsamentu Jerál Estadu (OJE) hodi implementa projetu komunitáriu, ne’ebé programa ne’e atu hadi’a ekola sira ne’ebé ho kondisaun a’at no hosi programa ne’e eskola balun hetan ona rebilitasaun, balun atinje ona 30%, balun to’o ona 40% no eskola seluk sei iha prosesu administrasaun.
“Ha’u hanoin liuhosi projeitu komunitáriu ida-ne’e, bele fó mós oportunidade emprega ba ita-nia joven sira iha suku,” nia tenik.
Jornalista : Natalino Costa
Editora : Julia Chatarina
