EKONOMIA, HEADLINE, INTERNASIONÁL, NASIONÁL, POLÍTIKA

Governu autoriza Ministru José Agustinho asina akordu tolu ho Indonézia

Governu autoriza Ministru José Agustinho asina akordu tolu ho Indonézia

Vise-Primeiru-Ministru no Ministru ba Planu no Ordenamentu, José Maria dos Reis, prezide reuniaun Konsellu Ministru, iha Palásiu Governu, kuarta (13/07). Imajen Tatoli/Francisco Sony

DILI, 13 jullu 2022 (TATOLI)–Governu liuhosi reuniaun Konsellu Ministru (KM), autoriza Ministru Transporte no Komunikasaun (MTK), José Agustinho da Silva, asina akordu tolu ho Governu Repúblika Indonézia.

“Akordu ne’e sei realize iha ámbitu vizita Estadu Prezidente Repúblika, José Ramos Horta, ba Indonézia iha loron 18 jullu 2022. Nune’e, Ministru Transporte no Komunikasaun, José Agustinho da Silva inklui mós iha delegasaun Xefe Estadu nian ba vizita Indonézia,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu, iha Palásiu Governu, kuarta ne’e.

Notísia relevante: Finaliza Tiha Akordu Fronteira Terrestre, TL-RI Kontinua Ba Diskusaun Fronteira Marítima

Akordu tolu ne’ebé Ministru Transporte no Komunikasaun atu asina maka ida ho Ministériu Transporte Repúblika Indonézia nian kona-ba Movimentu Transfronteirisu Autokaru Komersiál, akordu seluk maka entre ninia ministériu no Ajénsia Meteorolojia, Klimatolojia no Jeofízika Repúblika Indonézia kona-ba kooperasaun iha domíniu meteorolojia, klimatolojia no jeofízika no akordu ida tan Ministériu Komunikasaun no Informátika Repúblika Indonézia, ba kooperasaun iha domíniu komunikasaun no informátika.

“Akordu ida apoia komérsiu transfronteirisu no kooperasaun entre nasaun rua ne’e, ne’ebé permite hodi promove, dezenvolve no reforsa komérsiu, investimentu, turizmu no interkámbiu kulturál entre nasaun rua ne’e, liuhosi estabelesimentu sistema transporte integradu ida no efisiente, ne’ebé sei insentiva kreximentu no dezenvolvimentu ekonómiku iha Timor-Leste, maski hanesan ho benefísiu ba Indonézia,” Portavós Governu esplika.

Aleinde ne’e, kordu entre MTK no Ajénsia Meteorolojia, Klimatolojia no Jeofízika Repúblika Indonézia kona-ba kooperasaun iha domíniu meteorolojia, klimatolojia no jeofízika, ne’ebé parseria ne’e prevee iha memorandu atu apoiu dezenvolvimentu  meteorolojia, klimatolojia no jeofízika, setór importante ba Timor-Leste, liuliu iha área sira hanesan kalibrasaun ekipamentu meteorolojia no sismolójiku no kapasitasaun rekursu umanu sira.

“Akordu ho Ministériu Komunikasaun no Informátika Repúblika Indonézia ba kooperasaun iha domíniu komunikasaun no informátika atu haluan no hadi’a setór komunikasaun no informátika, ne’ebé implika kolaborasaun ho nasaun sira seluk hodi nune’e, ho forma ida ne’ebé proativa no asertiva, sira rua bele aumenta ninia efikásia atuasaun interna no esterna no iha sentidu ida-ne’e presiza atu estabelese baze koordenasaun no kooperasaun bilaterál iha kampu komunikasaun no informátika,” nia akresenta.

Jornalista   : Antónia Gusmão

Editora       : Julia Chatarina

iklan
iklan

Leave a Reply

iklan
error: Content is protected !!