Governu kompromete buka solusaun ba preokupasaun grupu soru-tais 10 RAEOA
DILI, 13 jullu 2022 (TATOLI)–Governu liuhosi Ministériu Turizmu, Komérsiu no Indústria (MTKI) kompromete atu buka solusaun ba preokupasaun grupu soru-tais 10 hosi Rejiaun Administrativa Espesiál Oé-cusse Ambeno (RAEOA).
Grupu soru tais 10 preokupa katak, antes ne’e, MTKI no Sekretaria Estadu Igualdade no Inkluzaun (SEII) koordena ho sira hodi halibur tais 317 atu lori ba Expo Dubai maibé Governu rai de’it iha kontentór laran to’o tinan-ida.
Ministru Prezidénsia Konsellu Ministru, Fidelis Manuel Leite Magalhães, hateten, Konsellu Ministru hetan informasaun no rona esplikasaun hosi parte MTKI ho ekipa katak kontentór ida la konsege ba uluk (Dubai) ne’e tanba restrisaun ne’ebé maka parte Dubai impoin, liuliu iha kontestu pandemia ne’ebé akontese hodi impede sasán sira labele tama-sai no sira impoin restrisaun maka’as ba nasaun sira hotu.
“Nune’e ita-nia kontentór rua, ida mak konsege bá, enkuantu seluk la biban tanba sira momentu ne’ebá taka entrada sasán sira hosi rai-li’ur ba atividade Expo. Buka solusaun ba situasaun ida-ne’e maka tuir informasaun ne’ebé ami hetan totál osan $40.000 resin hosi sasán sira ne’ebé iha kontentór laran no grupu sira fornese tiha ona. Governu iha ona solusaun atu solusiona asuntu ida-ne’e,” Portavoz Governu ne’e relata hafoin reuniaun ezekutivu, iha Palásiu Governu, kuarta ne’e.
Notísia relevante: Membru PN lamenta Governu la aprezenta tais RAEOA iha Expo Dubai
Nia dehan, preokupasaun hosi grupu soru-tais sira Governu anota no foti hela pasu konkretu sira atubele solusiona.
“Ministru Turizmu dehan ba ha’u rasik katak nia akompaña no hatene hela, maibé prosesu ne’e iha hela parte administrasaun nian hodi rezolve asuntu sira-ne’e. Solusaun ida maka sei sosa fali sasán sira, maibé ita hein de’it solusaun hosi MTKI nian,” Ministru akresenta.
Jornalista : Antónia Gusmão
Editora : Julia Chatarina
