PNTL Dili sei hasai karreta aat estasiona iha estrada públiku
DILI, 13 jullu 2022 (TATOLI)— Polisia Nasionál Timor-Leste (PNTL) liuhosi Unidade Tránzitu Munisípiu Dili koopera ho Diresaun Nasionál Monitorizasaun Jestaun Patrimóniu Estadu (DNMJPE), atu halo operasaun hodi hasai karreta aat ne’ebé estasiona kle’ur iha estrada públiku.
Operasaun ne’e ho objetivu hamamuk karreta aat ne’ebé na’in abandona no estasiona kle’ur iha estrada públiku hodi kauza ba engrafamentu iha kapitál Dili.
“Ita laiha ekipamentu pezadu atu hi’it karreta avaria sira, tanba ne’e ita presiza koordena fali ho parte Patrimóniu Estadu. Nune’e iha semana ida ka rua tan, ita sei halo fali operasaun iha Dili laran, atu foti karreta aat ne’ebé daudaun ne’e okupa ka para hela iha estrada públiku,” Komandante Unidade Tránzitu Munisípiu Dili, Inspetór Xefe Domingos Gama, hateten ba Agência TATOLI iha nia kna’ar fatin Caicoli, kuarta ne’e.
Veíukulu ho kondisaun aat ne’ebé na’in-husik hodi para iha estrada públiku ne’e viola ona dekretu-lei númeru 6/2003, 3 abríl, kona-ba Kódigu Estrada, ne’ebé iha artigu 49 no 50, sita kona-ba proibisaun ba parajen ou estasionamentu.
Tuir nia, antes seremónia investidura ba Prezidente Repúblika foun no komemorasaun 20 maiu, ekipa halo ona operasaun hodi hasai ka hamamuk karreta avaria sira ne’ebé paradu iha estrada públiku.
“Ita serbisu hamutuk ho Patrimóniu Estadu no konsege lalin karreta aat ualu, ne’ebé para hela iha pontu entrada hanesan área Aeroportu Nicolau Lobato, iha diresaun Santa-Cruz, Audian no Kampung Alór,” Komandante ne’e afirma.
Komandante Tránzitu ne’e, husu ba komunidade sira iha kapitál Dili ne’ebé na’in ba karreta avaria sira iha estrada públiku ho konsénsia hasai tanba provoka engrafamentu.
Jornalista: Natalino Costa
Editór : Florencio Miranda Ximenes
