iklan

EDUKASAUN, HEADLINE, MUNISÍPIU, OÉ-CUSSE (RAEOA)

Autoridade RAEOA sei konstrui sala aprendizajen ba EBF Fatukenfua

Autoridade RAEOA sei konstrui sala aprendizajen ba EBF Fatukenfua

OÉ-CUSSE, 18 jullu  2022 (TATOLI) –  Profesór sira iha Eskola Bázika Filiál (EBF) Fatukenfua, sub-rejiaun Nítibe, agradese ba Autoridade Rejiaun Administrativa Espesiál Oé-Cusse Ambeno (RAEOA), tanba tinan ne’e konsege konstrui sala aprendizajén iha eskola refere.

“Provizoriamente ha’u reprezenta profesór no estudante sira hosi EBF Fatukenfua agradese ba autoridade RAEOA, tanba konsege responde duni ami-nia preokupasaun atu harii kontrusaun foun ba ami-nia eskola, tanba eskola ne’e kondisaun grave ona, kuandu to’o tempu udan bele difikulta ami-nia prosesu aprendizajen,” Koordenadór EBF Fatukenfua, Baptista Lelan, informa ba Agência Tatoli liuhosi telefónika, sábadu ne’e.

Tuir nia, maske kontrusaun seidauk la’o maibé, daudaun ne’e rezultadu konkursu publika ona, katak EBF Fatukenfua tama iha projetu konstrusaun la’ós reabilitasaun, kompleta kedas ho nia orsamentu no empreza.

“Daudaun ne’e ekipa ida hosi edukasaun rejionál hamutuk ho empreza ezekutadór mai ona halo identifikasaun ba konstrusaun foun, maibé ho sira-nia prezensa, sira só hamenu de’it ba ami katak, semana rua tán kontrusaun hahú ona, tanba sei selebra kontratu ho autoridade mak foin ezekuta,” nia katak.

Entretantu, antes ne’e Sekretária Rejionál ba Asuntu Edukasaun Solidariedade Sosiál, Avelina da Costa, informa, iha tinan 2022  ne’e reabilita eskola unidade ualu no konstrusaun rua, tanba iha 2021 hetan dezastre naturál,  nune’e edukasaun pendenti hodi hatama iha planu manutensaun ba tinan 2022 ne’e.

“Eskola sira-ne’e pendente iha tinan kotuk tanba ita la konsege halo konstrusaun entaun ita re-programa ba tinan ne’e, ita espera antes udan monu rai eskola sira-ne’e kompleta ona konstrusaun ba manutensaun, atu fasilita oan sira hala’o prosesu aprendizajen,” nia katak.

Konstrusaun foun ba iha EFB Fatukenfua ne’e lokaliza iha suku Usitaku, sub-rejiaun Nítibe, ezekuta hosi empreza lokál Colo Meob Unipesoál Lda, ho valór kontratu $81,528.94, ne’ebé autoridade RAEOA aloka hosi Orsamentu Jerál Estadu (OJE) 2022 nian.

Nune’e EBF Fatukenfua edukasaun RAEOA akredita ona ba II siklu, primeiru-anu to’o sestu-anu ho  totál estudante hamutuk 113, maibé sala aprendizajen tolu (3) de’it, ho totál profesór na’in-neen (6) komposta hosi kontratadu na’in-lima (5) no permanente ida (1) no guarda ida.

 Jornalista  : Abílio Elo Nini

Editór           : Evaristo Soares Martins

iklan
iklan

Leave a Reply

iklan
error: Content is protected !!