HEADLINE, SEGURANSA

PNTL hetan tetu agregadu millaun $40 iha OJE 2023

PNTL hetan tetu agregadu millaun $40 iha OJE 2023

Vise-Ministru Interiór, António Armindo, hala'o vizita ba formatura membru PNTL sira. Iha resintu UEP, tersa (03/05). Imajen Tatoli/Francisco Sony

DILI,18 jullu 2022 (TATOLI)-Vise Ministru Interiór (V-MI), António Armindo, hateten, Polisia Nasionál Timor-Leste (PNTL), hetan tetu agregadu iha Orsamentu Jerál Estadu (OJE) 2023  hamutuk  millaun $40.

“Tetu agregadu ne’ebé maka Ministériu Finansa aprezenta iha reuniaun  Konselllu Ministru ba Ministériu Interiór (MI), liuliu ba Polisia Nasionál Timor-Leste (PNTL), hetan de’it millaun $40,” Vise Ministru Interiór hateten ba jornalista hafoin reuniaun Konsellu Ministru Exra-ordinária iha Palásiu Governu, segunda ne’e.

Tetu agregadu ne’e, Governante ne’e konsidera la to’o atu kobre nesesidade PNTL nian ba tinan oin liuliu halo atividade seguransa ba eleisaun parlamentár, halo rekrutamentu ba efetivu foun no hola fasilidade balun ba Unidade Polisia Maritima (UPF) no Unidade Patrollamentu Fronteira (UPF).

“Sosa mós fasilidade ba membru PNTL atu asegura eleisaun parlamentár tinan oin no aloka ba saláriu PNTL nian. Tanba kada tinan saláriu PNTL ne’e ho montante millaun $ 30 ou bele liután. Nune’e husu ba Ministru Finansa no relata ona ba Primeiru Ministru hanesan Ministru Interiór, atu halo alterasaun ba iha orsamentu ne’e,” nia esplika.

Governante ne’e fundamenta katak, antes ne’e PNTL propoin millaun $52 tanba tuir meta ne’ebé maka define ona. Enkuantu ba parte MI no Serbisu Migrasaun mak  propoin millaun $28.

Maibé, nia dehan Konsellu Ministru aprova tetu agregadu OJE 2023, ne’ebé aloka ba Ministériu Interiór hanesan instituisaun ne’ebé garante seguransa interna hetan millaun 10$ no Sekretária Estadu Protesaun Sivil (SEPS) no Autoridade Protesaun Sivil hetan millaun $15.

Notísia relevante:Governu aprova tetu agregadu OJE 2023 biliaun $1,8

 Jornalista: Natalino Costa

Editór        : Florencio Miranda Ximenes

iklan
iklan

Leave a Reply

iklan
error: Content is protected !!