DILI, 19 jullu 2022 (TATOLI)—Diretór Sentru Formasaun Profisionál (CFP, sigla portugés) Don Bosco Comoro, Irmão Adriano Maria de Jesus, hateten, daudaun ne’e hasoru hela difikuldade finanseiru.
“Situasaun ne’e akontese tanba ho situasaun COVID-19, doadór sira ne’ebé durante ne’e apoiu ami, agora ajuda mós menus ona,” Diretór Sentru informa ba Agência Tatoli, iha ninia knaar fatin, Don Bosco Comoro, tersa ne’e.
Doadór sira ne’ebé antes ne’e apoiu Sentru Formasaun Profisionál Don Bosco Comoro, hanesan salezianu sira hosi Europa, Portugal no Austrália.
“Durante ne’e ita hetan ajuda barak liu hosi Kongregasaun Salezianu Austrália, ne’ebé kada tinan ita halo proposta ba sira ho orsamentu $400.000, maibé tanba ho situasaun COVID-19 ajudu sira ne’e la to’o ne’ebá, maibé oituan ka barak sira fó ami simu,” nia akresenta.
Notísia relevante: Sentru Formasaun Don Bosco hein desizaun MEJD reativa formasaun
Aleinde ne’e, hosi parte Governu Timor-Leste, durante tinan-tolu ona la fó subsídiu tanba ho situasaun ne’ebé iha.
“Solusaun ba problema sira ne’e mak ita jere de’it osan ne’ebé estudante sira kada fulan selu ba eskola. Ita uza hodi selu fali ba profesór sira no sosa materiál treinamentu,” nia tenik.
CFP Don Bosco kada tinan simu estudante hamutuk 100 resin tuir formasaun hodi hetan sertifikadu nivél II.
“Estudante sira ne’ebé tuir kursu iha Don Bosco ne’e foku ba área soldadura, eletrisidade, karpintária, kanalizasaun no pedreiru, automotif no administrasaun, enkuantu ba feto sira kursu kona-ba sekretariadu nian,” nia salienta.
Jornalista : Arminda Fonseca
Editora : Julia Chatarina
