Top

CNRT sei realiza tasa “Xanana” hodi komemora loron konsulta popular

Diretór kompetisaun ba tasa Xanana, Elizeu Isaac.Imajen/Hortencio Sanchez

DILI, 19 jullu 2022 (TATOLI)– Partidu Congresso Nacional de Reconstrução de Timor (CNRT), realiza tasa “Xanana” durante fulan ida, hahú hosi 23 jullu to’o 23 agostu tinan ne’e, hodi selebra loron konsulta popular ba da-23, ne’ebé monu iha 30 agostu.

“Eventu ne’e,  inisiativa hosi CNRT hodi loke jogu futsal ho naran tasa “Xanana” ne’ebé sei hala’o durante fulan ida, hahú 23 jullu to’o 23 agostu iha kampu multifunsaun Bebora Dili,” Diretór kompetisaun ba tasa Xanana, Elizeu Isaac, hateten ba Jornalista sira iha Sede CNRT, Bairru Grilhos-Dili, tersa ne’e.

Iha eventu ne’e sei loke oportunidade ba klubu futsal femenina no mane ba suku 29 iha munisípiu Dili, la inklui munisípiu espesiák Ataúro no Metinaro.

Daudaun ne’e klube futsal femenina hamutuk 32 no mane 32 mak rejista ona hodi tuir kompetisaun. Enkuantu iha jogu ne’e komisaun sei la autoriza jogadór nasionál sira no jogadór hirak ne’ebé antes ne’e joga ona iha klubu.

“Ita hakarak jogadór foun sira mak partisipa iha jogu ne’e tanba ho intensaun atu buka jogadór foun hodi prepara sira ba futuru jogadór Timor -Leste nian,” nia afirma.

Tanba ne’e, kada klubu sei rejistu jogadór hamutuk na’in-12 no ofisial na’in-rua ho totál jogadór hamutuk 896.

“Orsamentu bá eventu hosi partidu CNRT. Eventu ne’e CNRT hakarak kontinua ba oin no sei la para, agora hahú iha Dili ne’ebé tinan oin sei komese fali hosi munisípiu seluk,” nia kompromete.

Jornalista: Hortencio Sanchez

Editór       : Florencio Miranda Ximenes

Publisidade

Leave a Reply

Latest Post

error: Content is protected !!