DILI, 20 jullu 2022 (TATOLI)– Liga Futeból Timor – Leste (LFTL) liuhosi Diretór Administrasaun no Protokolu, Janio Tilman, hateten LFTL preparadu no hein de’it desizaun Federasaun Futeból Timor-Leste (FFTL) ba data klaru atu realiza liga époka 2022.
“Ami liga preparadu no hein hela, maibé ita hein hela dokumentu ofisiál ruma hosi FFTL ne’ebé hanesan orgaun reguladór atu marka enkontru ofisiál ida atu hola desizaun loloos hodi liga époka ne’e bele realiza,” Diretór ne’e hateten ba Jornalista sira iha Estádiu Munisipál Dili, kuarta ne’e.
Alende ne’e, LFTL mós hein hela karta ofisial hosi Governu liuliu Sekretariu Estadu Juventude no Desportu (SEJD), nune’e bele fó oportunidade ba LFTL no FFTL tuur hamutuk atu foti desizaun hodi fó sai ba klube hotu ne’ebé hamahan-an iha LFTL.
“LFTL hanesan orgaun implementadór ita kontinua hein karta ofisial hosi SEJD no FFTL tanba parte rua ne’e importante tebes atu fó apoia ba kompetisaun liga époka tinan ne’e,” nia afirma.
Daudaun preparasaun LFTL nian atu hala’o jogu atinje ona 95%, ne’ebé hein de’it desizaun FFTL atu bele komesa liga iha fulan-agostu.
Tanba, tuir nia bainhira FFTL kontinua dada tempu no la fó karta autorizasaun ruma ba LFTL hodi realiza jogu mak liga sei labele la’o iha 18 agostu tuir estetmentu ne’ebé antes ne’e LFTL-FFTL fó sai ona ba públiku tanba tempu besik ona.
“Tempu ne’e besik loos ona, se kuandu FFTL laiha desizaun ruma mak liga sei labele hala’o iha agostu tanba haree ba tempu ne’ebé besik bele difikulta mós ba preparasaun klubu sira nian,” nia adianta.
Ho asuntu ne’e, Agência TATOLI hakbesik-an ba FFTL atu konfirma asuntu ne’e ba Sekretáriu Jerál no Adjuntu Sekretáriu Jerál, maibé okupadu ho servisu esensiál balun no seidauk bele fó komentáriu.
Molok ne’e, Liga Futeból Timor-Leste (LFTL), loke ona janela transferénsia ba klube 19 ne’ebé hamahan-an iha LFTL hodi halo rejistu ba jogadór, nune’e bele partisipa iha liga époka 2022, tuir kritéria no oráriu Asian Football Confederation (AFC).
LFTL husu ba klube hotu atu hakbesik-an ba edifisiu LFTL hodi rejista naran jogadór sira, nune’e bele kompete iha liga tinan ne’e.
Entretantu, jogu ba primeira divizaun ba primeira volta no segunda volta sei halao iha Estádiu Munisipál Dili no Estádiu Gleno ho totál jogu 90 ba klube 10 ne’ebé tuur hela iha primeira divizaun. Enkuantu ba segunda divizaun klube sia (9) sei joga de’it iha Estádiu Munisipal Dili hamutuk jogu 36.
Alende ne’e, iha jogu tasa 12 Novembru sei joga hosi klube 18 no nafatin hosi sistema vota fora ou lakon sai hamutuk jogu 18.
Klube 18 ne’e mak hanesan primeira divizaun AD SLB Laulara, AS Ponta Leste, Karketu Dili FC, Assalam FC, Emanuel FC, Aitana FC, Atletico Ultramar, Academica FC no Porto Taibessi FC.
Enkuantu, Segunda Divizaun mak hanesan, Kablaki FC, Nagardjo FC, DIT FC, Lica-Lica FC, Lemorai FC, AS Marca, FIEL FC, Zebra FC no Boavista FC Timor.
Jornalista: Hortencio Sanchez
Editór : Florencio Miranda Ximenes
