DILI, 21 jullu 2022 (TATOLI)—Koordenadór Jerál Foo Hau Kiun (FHK), Pascoal Suri Mali, hateten, daudaun ne’e folin mina-sona kontinua sa’e iha merkadu nasionál tanba situasaun globál.
“FHK nu’udar mahon ba empreza 12, inklui mós ba Lisun ne’ebé hanesan distributór sasán, daudaun ne’e ita fa’an folin sasán sira seluk nafatin, maibé ba folin mina-sona mak iha mudansa. Tanba ne’e situasaun mundiál, ne’ebé mundu hotu enfrenta,” Koordenadór Jerál FHK informa ba Agência Tatoli, iha ninia knaar fatin, Leader, kinta ne’e.
FHK rasik iha traballadór hamutuk 3.000 resin tanba FHK grupu ba empreza 12 hanesan Lita Store, Leader Mart, Leader Hypermarket, Lisun Timor, Lisun Ralo Brilihante, Lita Cold, Auto Timor-Leste, Central Hardware, Cement Timor Trading, Liang Timor, Lisun Export no Importasaun, no Li Britadeira.
Notísia relevante: MTKI halo monitorizasaun ba folin mina-sona sa’e iha merkadu nasionál
Nia dehan, mina-sona ne’ebé daudaun empreza 12 fa’an ne’e ho marka tolu hanesan Sawit Gading mili litru 600 ho folin $1,30, Filma mili litru 750 ho folin $6,75, Stela Super litru rua ho folin $5, no litru lima ho folin $12.
“Kona-ba sasán sira seluk hanesan foos Folson kilograma 20 ho folin $17, Furak liu kilograma 15 ho folin $12, kilograma 25 ho folin $13, no kilograma 30 ho folin $15, foos ne’ebé ami fa’an ne’e folin nafatin inklui sasán sira seluk iha loja 12 FHK nian,” nia akresenta.
Kona-ba saláriu traballadór bazeia ba saláriu mínimu $115 ne’ebé Governu define ona.
“Foin lalais ita rona Governu atu hasa’e saláriu $115 ba $135 ne’e di’ak tebes, maibé ami hanesan empreza bainhira polítika Governu ne’e realiza, sei iha mudansa hotu mós ba folin sasán ne’ebé ita fa’an, tanba ita halo negósiu ne’e buat hotu ita sura ona no orsamentu ne’ebé ita halo ba negósiu ne’e mós la’ós orsamentu Governu nian,” nia dehan.
Iha sorin seluk, Jerente Perissos, Filomena Lay, hateten, loja distributór ne’e fa’an foos ho folin nafatin, maibé mudansa iha mina-sona ho marka Bintang mili litru 250 kaixa ida $21, Enaak litru lima kaixa ida $36, enaan litru 1,7 kaixa ida $22, globus litru lima kaixa ida $36, Gostu Loos mili litru 620 kaixa ida $31 Sania litru lima kaixa ida $36.
“Fulan kotuk mina ho marka Gostu Loos ita hasa’e folin, maibé agora folin tun oituan,” nia tenik.
Enkuantu, kona-ba foos folin nafatin, marka Vitória kilograma 20 ho folin $10,70, kilograma 25 ho folin $13,50 no kilograma 30 ho folin $16,25.
Jornalista : Arminda Fonseca
Editora : Julia Chatarina
