iklan

EKONOMIA, HEADLINE

MTKI halo monitorizasaun ba folin mina-sona sa’e iha merkadu nasionál

MTKI halo monitorizasaun ba folin mina-sona sa’e iha merkadu nasionál

Ilustrasaun mina-sona. Imajen/Espesiál

DILI, 08 abril 2022 (TATOLI)–Ministériu Turizmu Komérsiu no Indústria (MTKI) liuhosi Diresaun Nasionál Regulasaun Komersiál no Protesaun Konsumidór (DNRPK) halo monitorizasaun ba folin mina-sona ne’ebé daudaun ne’e sa’e iha merkadu nasionál.

Diretora Nasionál Regulasaun Komersiál no Protesaun Konsumidór, Bertinette Viera Lobo Baptista, hateten atividade ne’e atu hatene loloos folin mina-sona sa’e iha merkadu nasionál.

“Hosi monitorizasaun ne’e hatudu katak folin mina-sona sa’e duni, tuir dadus ne’ebé ami rekolla, folin normál mina-sona litru 4,5 hosi distributór ho folin $6,93 iha fevereiru to’o marsu maibé agora $7,38. Nune’e, iha fevereiru retallu negosia mina-sona litru 4,5 hosi $7,25 to’o $7,75,” Diretora Nasionál informa ba Agência Tatoli, iha ninia knaar fatin, sesta ne’e.

Notísia relevante: Timor-Leste ameasadu enfrenta menus mina-sona iha merkadu

Distributór negosia mina-sona litru 2 ho folin $3,50 iha fevereiru no folin sai $4 iha marsu, nune’e presu loja no merkadu hosi $3,75 sa’e ba $4,25.

Tuir dadus ne’ebé MTKI rekolla, folin masin-midar mós sa’e oituan iha merkadu, kilograma 50 ho folin $33,50 iha fevereiru no marsu no hosi retallu negosia $33,75 iha loja no merkadu.

Dadus sira ne’ebé parte MTKI foti hosi loja distribuitór neen iha Dili hanesan Perisos, Lisun, Fortuna, Alfa Dili, Kreative Furak dan W4.

Tuir Bertinette Viera, folin sasán sa’e tanba nasaun exportadór la disponível hatama nesesidade bázika barak liután mai TimorLeste.

“Indonézia hanesan nasaun distributór seidauk disponível hatama ai-han no sasán seluk tan ho kuantidade barak mai Timor-Leste. Governu Indonézia sei foku ba demanda sira-nia merkadu,” nia tenik.

Daudaun ne’e, sei iha distributór rua iha rai-laran mak iha stock mina-sona, ne’ebé presiza ona distribui ba retallu sira. Perisos iha mina-sona kontentór sanulu no Fortuna iha kontentór 23. 

Tuir Dirijente ne’e, Distributór sira presiza hetan apoiu hosi Governu atu garante prosesu transportasaun sasán to’o tama Timor-Leste.

Jornalista : Arminda Fonseca

Editora     : Julia Chatarina

iklan
iklan

Leave a Reply

iklan
error: Content is protected !!