DILI, 25 jullu 2022 (TATOLI)—Ekipa hosi Organizasaun Juventude Estudu Timor Lorosa’e (OJETIL) hasoru malu ho Primeiru-Ministru (PM), Taur Matan Ruak, hodi ko’alia kona-ba konferénsia datoluk ne’ebé sei realiza iha tinan ne’e.
“Konferénsia daruak nian halo iha tinan 2014, ne’ebé datoluk nian ne’e sei hala’o durante loron-tolu, hahú hosi loron 10 to’o 12 novembru 2022,” Prezidente Konsultivu OJETIL, Tomé Xavier Jerónimo, relata hafoin hasoru malu ho Xefe Governu, iha Rezidénsia PM, Farol, segunda ne’e.
Notísia relevante: Organizasaun rezisténsia aplika fundu GASC tenke rejistu iha Konsellu Veteranu
Objetivu konferénsia ne’e atu halibur filafali membru sira tanba tinan hirak ona la realiza, nune’e bolu fali membru sira atu haree programa sira hodi adapta no responde ba nesesidade membru no organizasaun tanba OJETIL iha ona ninia sede.
“Biban ne’e ami mai atu konvida mós Primeiru-Ministru atu partisipa, tanba iha ámbitu konferénsia sei inaugura mós ami-nia sede. Primeiru-Ministru atu bá haree mós edifísiu OJETIL nian ne’ebé hetan apoiu hosi governasaun Xanana nian,” nia haktuir.
Prezidente Konsultivu OJETIL dehan, durante ne’e membru sira hala’o serbisu iha faze, liuliu iha área agrikutura, ne’e hanesan programa integradu ne’ebé hala’o iha sentru lima hanesan iha Ermera, Manatuto, Natarbora, Ossu no Cailaco.
“Ami ko’alia kuaze oras ida no Primeiru-Ministru hato’o mensajen furak mai ami. Ami sente morál atu lori ami hanoin filafali rezisténsia uluk ne’e halo ho kosar-been sein apoiu. Agora OJETIL ba oin ne’e oinsá atu harii karater joven ida ba oin. Ida-ne’e papel boot ida ba OJETIL no ami sente todan maibé ho konversa ida hanesan maun ba alin, senti fó apoiu ba ami atu buat di’ak ba organizasaun,” nia orgullu.
Jornalista : Antónia Gusmão
Editora : Julia Chatarina
