DILI, 26 jullu 2022 (TATOLI)–Aviaun komersiál Citilink ho tipu PK-GQE hetan insidente bainhira atu halo voo hosi Dili-Denpasar mai Dili, Timor-Leste, iha Aeroportu Internasionál Prezidente Nicolau Lobato, segunda (25/07).
Iha voo ne’e, aviaun Citilink transporta pasajeiru hosi Denpasar mai Dili na’in-117 no tuir loloos semo filafali bá Denpasar hodi transporta pasajeiru na’in-137, maibé la konsege no tenki para kalan ida iha Aeroportu Comoro.
Responsável Citilink iha Timor-Leste, Fernando da Silva, klarifika, aviaun ne’e bainhira to’o iha Dili iha segunda ne’e, ho kondisaun hotu la’o di’ak, maibé hafoin tékniku halo inspesaun hatudu katak iha aviaun nia liras iha parfuzu balun laiha.
“Horiseik aviaun Citilink mai hosi Denpasar tula pasajeiru hamutuk 177, hafoin to’o iha aeroportu buat hotu la’o di’ak, maibé hafoin tékniku ba check filafali iha aviaun nia liras, iha baut ka parfuzu mak laiha, entaun tuir prosedura ba safety nian, pilotu deside labele semo filafali bá Denpasar, tanba nia tenki hetan aprovasaun hosi Jakarta.
Notísia relevante: Aviaun Citilink semo tarde kauza inundasaun iha aeroportu Nicolao Lobato
horiseik (segunda) hein to’o lorokraik maibé desizaun seidauk iha, nune’e pilotu ho ekipa ninia oras serbisu termina ona, entaun tuir nia rekezitu kuandu oras serbisu hotu ona sira tenki fila ba deskansa, ne’ebé deskansa mínimu ne’e oras ualu, hafoin mak bele semo filafali,” Responsável Citilink iha Timor-Leste hateten iha Aeroportu Comoro, tersa ne’e.
Bainhira desizaun hosi edifísiu sentrál iha Jakarta autoriza aviaun ne’e semo hikas, nune’e, serbisu hamutuk ho Autoridade Aviasaun Sivil Timor-Leste (AACTL, sigla portugés) no Aeroportu no Nevegasaun Aérea Timor-Leste (ANATL), tersa dadeer ne’e sira semo filafali ona bá Denpasar.
“Aviaun ne’e ninia kondisaun di’ak hela, pilotu kuandu dehan semo ona ne’e signifika katak di’ak mak hodi semo ne’e, nia hodi pasajeiru la’ós aviaun mamuk. Sira tula pasajeiru loloos 137 maibé balun kansela ne’ebé 120-resin, sira balun bá Jakarta no balun timor-oan sira ne’ebé bá Europa,”nia tenik.
Kona-ba parfuzu hamutuk 14 mak laiha, Fernando da Silva rekoñese katak informasaun ne’e loos maibé kada aviaun ida semo tenki iha tékniku ida tuir, ne’ebé tékniku rezolve ona situasaun ne’e.
Jornalista : Antónia Gusmão
Editora : Julia Chatarina
