DILI, 26 jullu 2022 (TATOLI)–Ministériu Edukasaun Juventude no Desportu (MEJD) tinan ne’e prevee ona fundu $800.000 hosi orsamentu retifikativu atu apoiu instala liña internet ba eskola iha territóriu nasionál.
“Tinan ne’e ita hahú tau orsamentu $800.000 iha área IT edukasaun nian atu apoiu eskola besik 1.000 hanesan ne’e atubele asesu ba liña internet ba to’o iha area rurál,” Ministru Edukasaun Juventude no Desportu, Armindo Maia, edifísiu MEJD, Vila verde, tersa ne’e.
Planu MEJD prevee fundu, hetan mós reasaun di’ak hosi parseiru dezenvolvimentu sira, ne’ebé antusiazmu hakarak serbisu hamutuk ho ministériu atu dezenvolve informátika iha edukasaun.
“Ohin lorokraik señor Embaixadór Koreia mai Timor-Leste hamutuk ho Prezidente empreza Samsung Nova Zelándia mai hasoru malu ona ho ha’u hodi diskute kona-ba posibilidade bele serbisu hamutuk ho ita liuhosi área IT (siénsia teknolojia) iha edukasaun,” nia akresenta.
Notísia relevante: MEJD deside profesór voluntáriu 470 apoiu programa eskola iha uma
Orsamentu ba verba ne’e prevee tanba ministériu konsidera iha fatin barak sei enfrenta hela problema liña internet inklui eletrisidade, tanba ne’e hafoin rona planu no programa Governu nian, empreza Samsung hanoin hakarak serbisu hamutuk atu dezenvolve área IT hodi ajuda eskola sira bele asesu ba liña internet.
“Ita hakarak aproveita oportunidade ne’e ho empreza SAMSUNG hodi diskute hamutuk posibilidade bele aselera prosesu ne’e hodi bele harii buat ruma iha edukasaun. Ohin ita foin esplora ideia ne’ebé posibilidade sei iha oportunidade tuir mai atu diskute liu hodi bele hahú kooperasaun, maibé ita hein Konetividade,” nia tenik.
Jornalista : Tomé Amado
Editora : Julia Chatarina
