DILI, 26 jullu 2022 (TATOLI)- Ministru Justisa, Tiago Amaral Sarmento, tersa ne’e, hala’o enkontru ho Reprezentante Santa-Sé (Vatikanu) iha Timor-Leste (TL), Núnsiu Apostóliku Monseñor Marco Sprizzi no Reprezentante Konferénsia Episkopál Timorense (CET,sigla portugés), hodi ko’alia kona-ba prosesu sertifikasaun estatutu personalidade jurídika Igreja Katólika iha Timor-Leste.
“Tempu badak nia laran, Ministériu Justisa liuhosi notariadu sei sertifika estatutu personalidade jurídiku Igreja Katólika. Maibé molok atu ba sertifikasaun, Ministru Justisa husu Dioseze no parókia sira tenke submete lai dokumentu balun liga ezisténsia Dioseze no Parókia nia, nune’e Ministériu Justisa prosesa hodi bele sertifika,” Ministru Justisa Tiago, hateten hafoin enkontru iha gabinete MJ-Colmera,tersa ne’e.
Notísia relevante: Kada tinan, Governu fó subvensaun millaun $15 ba Igreja Katólika
Sertifikasaun ba estatutu personalidade jurídiku ne’e bazeia ba konkordata ne’ebé Governu Timor-Leste asina ho Santa Sé, ne’ebé iha artigu balun sita katak Governu Timor-Leste presiza fó sertifikasaun ba estatutu personalidade jurídika ba Igreja Katólika iha Timor-Leste hodi fó rekonesimentu ba ezisténsia Dioseze no Parókia sira.
Tanba ne’e, nia dehan Governu liuhosi Ministériu Justisa laiha problema no laiha diskusaun tan atu sertifika estatutu personalidade jurídiku Igreja katólika iha Timor-Leste.
Iha biban hanesan, Rezentante Santa Sé iha Timor-Leste, Núnsiu Apostóliku Monsenõr Marco Sprizzi, hateten liuhosi enkontru ne’e Ministru Justisa konkorda atu sertifika estatutu personalidade jurídika ba Igreja Katólika iha Timor-Leste.
“Ami kontente loos tanba Ministru Justisa rasik konkorda no deside katak, tempu badak nia laran, sertifika estatutu personalidade jurídika Igreja Katólika iha Timor-Leste, hodi fó rekoñesimentu ba Párokia no Dioseze sira,” Reprezentante Santa Sé iha Timor-Leste, agradese.
Notísia relevante: Igreja Katólika TL estabelese Tribunál Eklesiástiku atende kazu matrimóniu
Jornalista : Natalino Costa
Editór : Florencio Miranda Ximenes
