DILI, 28 jullu 2022 (TATOLI)–Kompañia HEINEKEN Timor-Leste liuhosi programa hakbiit ekonomia feto, kinta ne’e, fó ona apoiu ekipamentu negósiu ba feto benefisiáriu hamutuk ema na’in-10 hodi halo atividade negósiu.
Materiál ne’ebé maka benefisiáriu na’in-10 simu husi HEINEKEN Timor-Leste maka hanesan tenda no ekipamentu tein hahán no seluk tan.
Notísia Relevante :Heineken fasilita feto 12 halo negósiu kiik
Country Directór HEINEKEN Timor-Leste, Prasantha Manjuka, hateten programa hakbiit ekonomia feto ne’e ho objetivu atu hakbiit feto Timor-Leste iha área ekonomia no sosiál liuhosi forma materiál, formasaun, no akompañamentu relasiona ho emprendedorizmu no mós dezenvolve negósiu kiik nune’e bele hadia ekonomia família no padraun moris.
Ba tinan 2022, nia dehan HEINEKEN Timor-Leste liuhosi programa “Hakbiit ekonómia Feto” ne’ebé suporta hosi Bintang brand ho esforsu ida atu fó kbiit ba feto maluk sira, no lori oportunidade ba asesu iha merkadu ne’ebé sei hasa’e sira-nia padraun profisionál nian, hamosu dezafiu hodi koko sira-nia abilidade no liuliu forñese fonte reál dezenvolvimentu no sustentabilidade atu nune’e sira bele lidera sira nia negósiu kiik sira.
Nia hateten HEINEKEN ho komprimísiu atu kontinua fó apoiu ba feto vulneravel iha Timor-Leste, tanba hetan suporta di’ak hosi USAID’s Tourism for All Project, nomos hosi Autoridade Munisipíu Dili atu promove ekonómia lokál no empoderamentu feto Timor.
“Rekoñese potensiál hosi vendedór ai-han dalan ninin, hanesan fonte importante ida mós ba moris lorloron nian no fasilita vendedór sira sai boot no hetan rendimentu ne’ebé di’ak,”Prasantha Manjuka, hateten, iha Timor Lodge, Comoro, Dili.
Prasantha Manjuka informa benefisiáriu na’in sanulu ne’e, identifika husi Diresaun Jestaun Merkadu no Turizmu Munisípiu Dili iha fulan-marsu 2022 hodi hetan apoiu husi HEINEKEN Timor-Leste.
Iha fulan-maiu liubá, ho apoiu hosi USAID’s Tourism for All Project konsege oferese formasaun soft skill ba benefisiáriu na’in-10 ne’e kona-ba seguransa ai-han, atendimentu kliente, jestaun báziku negósiu no literasia finanseira, komersializasaun dijitál atu oinsá promove sira-nia negósiu liohusi média sosiál.
“Iha fulan-abríl, benefisiáriu sira simu treinamentu tein hosi Chef Cesar Gaio iha Restaurante Dilicious ho objetivu mak atu dezenvolve sira-nia tékniku tein no introdús reseita foun, nomós hatudu oinsá atu serve hahán ne’ebé atrativu no atu oinsá halo prosesu ba hahán ho uza ingrediente tradisionál ne’ebé fasil atu hetan no baratu,” nia hateten.
Tuir planu hosi HEINEKEN liuhosi Bintang brand atu tulun benefisiáriu na’in 10 hodi sira-nia hahán bá faan iha atividade Nigth Market iha Timor-Plaza Dili.
Iha fatin hanesan, Prezidente Autoridade Munisípiu Dili, Guilermina Ribeiro, hateten agradese ba apoiu husi HEINEKEN no USAID’s ba feto maluk sira liuhosi programa Hakbiit Ekonómia Feto.
“Apoiu ida ne’e bele ajuda ita-nia feto maluk sira bele ajuda ekonómia família nian, nune’e ha’u husu ba imi aproveita oportunidade ida ne’e ho di’ak hodi hatudu katak ita feto mós bele susesu,” nia dehan.
Nune’e, Benefisiária Luciana Ximenes, hateten sei uza oportunidade ne’e hodi dezenvolve sira-nia ekonomia uma-laran.
“Tanba antes ne’e ami hetan formasaun lubuk ida hosi HEINEKEN no USAID’s Tourism for All Project, kona-ba seguransa ai-han, atendimentu kliente, jestaun báziku negósiu no literasia finanseira, komersializasaun dijitál oinsá promove ami-nia negósiu liuhosi mídia sosiál ne’ebé buat ne’ebé aprende ba oin ami sei aplika iha ami-nia negósiu,” nia hateten.
Benefisiáriu na’in-10 ne’e hala’o atividade negósiu ne’ebé diferentel tanba balun tunu sate, faan dosi, faan hahán tasak no seluk tan.
Entretantu, HEINEKEN implementa programa hakbiit ekonomia feto hahú kedas iha tinan 2016 no iha tinan 2021 suporta ona feto hamutuk ema na’in 12, ne’ebé halo atividade loke kioske, faan hahán no seluk tan.
Notísia Relevante :Heineken-AEMTL Oferese Kioske Ba Feto Kbiit-La’ek Na’in-Hitu
Jornalista : Arminda Fonseca
Editora : Agapito dos Santos
