Padre Bento enkoraja Agência Tatoli fornese notísia favoravél ba públiku
DILI, 29 jullu 2022 (TATOLI)—Diretór Nasionál Institutu Misaun Ponte Ofisiál Timor-Leste, Padre Bento Barros Perreira, enkoraja mídia estatál, Agência Noticiosa de Timor-Leste-Tatoli, Institutu Públiku (Agência Tatoli, I.P) atu fornese notísia favorável ba públiku.
“Ita presiza garante informasaun kona-ba siénsia teknolojia ida di’ak tebes ba ita-nia audénsia sira, liuhosi kontinua nafatin hato’o notísia ne’ebé loloos no favorável ba ita-nia públiku,” Padre Bento hateten iha edifísiu Agência Tatoli, I.P, Farol, sesta ne’e, bainhira sai oradór iha semináriu ne’ebé realiza iha ámbitu aniversáriu Agência Tatoli, I.P ba da-VI ho tema ‘Reforsa Papel Tatoli hodi Hasa’e Koñesementu Públiku ba Domina Siénsia no Teknolojia liuhosi Informasaun’.
Notísia relevante: MAPKOMS husu TATOLI públika informasaun lais, loloos no kredivél
Nia husu mídia estatál ne’e atu reflete no haree filafali ba papel Tatoli nian jerál no espesiál, koñesimentu siénsia no teknolojia jerál iha mundu no espesifikamente sosiedae iha Timor-Leste.
Aleinde ne’e, iha ámbitu aniversáriu Agência Tatoli ba dala-VI, buat ne’ebé presiza tau atensaun mak tenke la’o tuir objetivu no funsaun.
“Sensibiliza dezenvolvimentu siénsia no teknolojia ida-ne’e hanesan serbisu fundamentál Tatoli nian tanba iha mundu komunikasaun siénsia no teknololojia ho ita ema sai nu’udar utente ativa,” nia akresenta.
Nune’e, atu haforsa papel Agência Tatoli mak hodi serví públiku Timor-Leste, haforsa instituisaun, nune’e atu halo ida-ne’e,instituisaun ida labele hamriik metin liután maibé presiza serbisu ida ne’ebé mak ekipa produsaun maski ekipa ne’e rasik iha tiha ona, maibé iha prátika serbisu ne’e tenke sai hanesan ekipa produsaun ne’ebé halo serbisu ho ninia vizaun ida de’it.
“Ita tenka kompartilla vizaun ida de’it, labele idaidak halo ninia vizaun maibé tenke kompartilla vizaun ne’ebé ita iha, tenke iha konektividade elementu no komponente tomak, tenke iha konetividade ida atu hotu-hotu iha asesu ba informasaun,” nia tenik.
Bainhira kompartilla ona komponente tomak mak fundamentasaun ba teknolojia ida forte tebes ho atualiza ba meiu komunikasaun no maneira komunikasaun ba buat hirak ne’ebé iha mundu komunikasaun tenke halo bele iha fundamentasaun teknolojia ida forte.
Iha biban ne’e, oradór ne’e refere ba bíblia, São João kapítulu 8 versíkulu 32, ne’ebé hateten bainhira imi buka hatene kona-ba lia loos basá lia loos mak sei liberta imi.
“Ida ne’e atu hateten katak, se ita atu ko’alia kona-ba lia loos atu garante liberdade iha informasaun, ita tenke ko’alia duni sé ita la ko’alia kona-ba lia loos labele garante liberdade ida iha informasaun ita atu hetan no atu fahe informasaun ba ema seluk,” Padre Bento dehan.
Jornalista : Arminda Fonseca
Editora : Julia Chatarina
