DILI, 04 agostu 2022 (TATOLI)— Komandu Polisia Nasionál Timor-Leste (PNTL), Munisípiu Dili, kuarta (03/08), kalan ,hala’o operasaun ka pasa revista hodi halo apreensaun ba motor hamutuk 90 tanba viola kódigu estrada.
Komandante Komandu PNTL Munisipiu Dili, Superintendente Xefe Polisia Henrique da Costa, haktuir, atividade ne’e halo hodi eduka nafatin sidadaun sira atu respeita kódigu estrada.
“Ita foka de’it ba motorizada no ita halo apreensaun ba motór hamutuk 90, kompostu hosi motór 49 ne’ebé aprrende hosi Eskuadra Cristo Rei, Becora no Eskuadra Dom-Alexo ne’ebé halo apreensaun motor 41 iha área Raikotu Comoro tanba viola dekretu lei númeru 6/2003, kona-ba kódigu Estrada,” Komandante Henrique, hateten liuhosi nota ne’ebé Agência TATOLI asesu, kinta ne’e.
Komandante ne’e afirma iha atividade pasa revista ne’e, konsege identifika sidadaun barak mak kontra kódigu Estrada tanba la monta asesores motor hanesan xápa matríkula oin kotuk, lampu no espellu laiha, la uza kapasete, uza kanu-resin hodi halo barullu no maioria laiha karta kondusaun.
“Motorizada hirak ne’e sei entrega hikas ba nain, maibé tenke liuhosi prosesu administrasaun ne’ebé selu multa iha banku Banco Nacional de Comércio de Timor-Leste, hafoin mai foti fali sira nia motor,” nia hateten
Alende pasa revista ne’e ba motorizada, PNTL liuhosi Esquadra Nain Feto, Vera-Cruz, Metinaro, PNTL Cristo-Rei no Dom Aleixo, halo mós operasaun la’o ain ne’ebé maka hetan apoia hosi Servisu Investigasaun Kriminál, Servisu Informasaun Polisia no Seksaun Forsa Rezerva (Taksforce) hodi prevene konflitu iha bairru risku sira.
Jornalista: Natalino Costa
Editór : Florencio Miranda Ximenes
