DESPORTU, DILI, HEADLINE

AFF Championship U-16, Timor-Leste manán Brunei 10-0

AFF Championship U-16, Timor-Leste manán Brunei 10-0

Ekipa Futebol Timor-Leste U-16. Imajen/espesial

DILI, 05 agostu 2022 (TATOLI) – Armada Timor -Leste ho naran istimadu Lafaek Under 16 (U-16) ne’ebé lidera hosi treinadór Mister Kim, hatudu progresu di’ak iha nia jornada segundu kontra Brunei Darusalam iha Indonézia ho rezultadu 10-0.

Enkuantu, iha jogu primeiru ekipa Timor -Leste kontra Laos ho eskore 1-1, ho nune’e ekipa nasaun rua obrigadu tenke fahe pontu ba malu ho hanesan 1-1.

Maibé,  iha jogu segundu kontra Brunei, ekipa Timor-Leste hatudu performe brillante tebes hodi domina bola iha kampu laran to’o ikus “festa golu” ne’ebé extraordinariu ba rede Brunei nian.

Golu vitória ne’ebé lori Timor – Leste hetan vitória prodús hosi jogadór, Alexandro Lemos iha Minutu 34, 38, 65 no 74, Luis da Silva iha minutu 52, Awangku Muhammad (Own Goal) minutu 54, Norberto Goncalves minutu 55, Fabio Pires iha minutu 76, Jeremias dos Santos iha minutu 79 no Totifanio Amaral iha minutu 86.

Hosi rezultadu ne’e lori Timor – Leste provizoriu lidera tabela klasifikasaun ho pontu haat iha pozisaun primeiru, Thailandia pozisaun segundu ho pontu haat, Laos pozisaun terseiru ho pontu rua no ikus liu Brunei ho pontu zero.

Jogu ne’e fahe ba grupu tolu hanesan Grupu A kompostu hosi nasaun Indonézia, Vietname, Filipina no Singapura, grupu B hanesan, Timor-Leste, Táilandia, Laos no Brunei. Enkuantu grupu C mak Malázia, Myanmar, Austrália no Kamboja.

Tanba ne’e, Timor – Leste sei iha jogu ikus 07 agostu  kontra Táilandia bainhira manán ou empata Timor-Leste iha oportunidade ultrapasa ba semi final kopa AFF tinan ne’e.

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!