DESPORTU, DILI, HEADLINE

Atleta timor-oan hetan medalla 12 iha ASEAN Para Games 2022

Atleta timor-oan hetan medalla 12 iha ASEAN Para Games 2022

Primeiru-Ministru, Taur Matan Ruak, Ministru Edukasaun Juventude no Desportu, Armindo Maia, no Sekretáriu Estadu Juventude no Deportu, Abrão Saldanha, hasai foto hamutuk ho atleta Paralímpiku, iha salaun PCM, Palásiu Governu, segunda (08/08). Imajen/GPM

DILI, 08 agostu 2022 (TATOLI) – Atleta Paralímpiku Timor-Leste, segunda ne’e, fila hikas mai Timor-Leste, hafoin rekolla ka konkista medalla 12 kompostu hosi osan mean 6 no osan mutin 5 no osan metan rua iha ASEAN Para Games 2022 dala-11, iha Solo, Indonézia.

Medalla hamutuk 12 ne’e konkista hosi modalidade desportiva tolu hanesan Atletizmu, Ténis Meza no Hiit Besi.

Atleta hirak ne’e mai ho aviaun Citilink no to’o iha aeroportu Internasionál Nicolau Lobato, Dili, purvolta tuku 12:20 OTL ne’ebé simu direta hosi Ministru Edukasaun, Juventude no Desportu, Armindo Maia, Parlamentu Nasionál ne’ebé reprezenta hosi Vise Prezidente, Maria Angelina Sarmento, no Sekretáriu Estadu Juventude no Desportu (SEJD) no organizasaun ema ho difisiente sira.

“Lori Governu tomak no reprezentante hosi Primeiru Ministru hatoo bemvindu no parabéns boot ba imi hotu tanba imi hatudu duni rezultadu di’ak, maske ho kondisaun ka ema ho difisiénsia mas bele kompete no hetan medalla barak hanesan ne’e,” Ministru Armindo Maia hateten iha Aeroportu Internasionál Prezidente Nicolau Lobato Dili, segunda ne’e.

Medalla ne’e oferese hosi modalidade Atletizmu hanesan atleta Teofilo Freitas, Domingos Lobato Pereira no Domingas da Costa.

Nune’e, Hosi modalidade ténis meza mak oferese hosi Pascoela dos Santos no Abelita Borges no Bernardo de Carvalho. Enkuantu modalidade hiit besi hetan medalla mak atleta José Aniceto Antonio Serão.

Hosi modalidade tolu ne’e Para atletizmu reprezenta atleta na’in-neen, kompostu hosi feto tolu mane tolu, Para ténis meza  reprezenta mós atleta na’in-lima, mak feto rua no mane tolu no Hiit besik mak na’in-haat mesak mane de’it.

Atleta hirak ne’e CPNTL no SEJD hala’o preparasaun iha sentru treinamentu durante fulan-tolu hahú maiu to’o arranka bá Indonézia ne’ebé ikus hatudu rezultadu di’ak.

Orsamentu ne’ebé Governu gasta ba atleta hirak ne’e iha sentru treinamentu durante fulan tolu hamutuk $38.410,00 no orsamentu totál gasta ba atleta sira ba partisipa iha eventu ne’e hamutuk $65.679,50.

Jornalista: Hortencio Sanchez

Editór       : Florencio Miranda Ximenes

iklan
iklan

Leave a Reply

iklan
error: Content is protected !!