Governu aprova kontratu públiku konstrusaun eskema irrigasaun rua

DILI, 10 agostu 2022 (TATOLI)–Governu liuhosi reuniaun Konsellu Ministru (KM), kuarta ne’e, delibera ona hodi aprova prosedimentu aprovizionamentu, tuir konkursu públiku internasionál hodi halo kontratu públiku sira ba konstrusaun eskema irrigasaun rua.

Proposta ne’e aprezenta hosi Ministru Agrikultura no Peska (MAP), Pedro dos Reis.

“Irrigasaun rua ne’e, ida lokaliza iha postu administrativu Laivai, munisípiu Lautém no ida seluk iha Gallata, munisípiu Baucau,” Ministru Prezidénsia Konsellu Ministru, Fidelis Manuel Leite Magalhães, hateten, hafoin reuniaun ezekutivu iha Palásiu Governu.

Notísia relevante: MAP konsege rezolve irrigasaun haat hosi projetu ualu

Projetu irrigasaun Galata sei kobre ho ektare 600 no sei benefisia uma-kain hamutuk 750, enkuantu projetu ba irrigasaun Laivai sei kobre ektare 300, ne’ebé inklui  natar ne’ebé eziste ona no sei benefisia ba uma-kain hamutuk 434.

Jornalista   : Antónia Gusmão

Editora      : Julia Chatarina