Top

João Coreia eleitu sai Prezidente FWTL

Federasaun Wushu Timor-Leste (FWNTL), realiza kongresu datoluk ho tema “Reforsa no Hametin Organizasaun hodi lori Prosperu Unidu no Lori WUSHU ba Kompetisaun Internasionál”.Imajen espesiál

DILI, 10 Agostu 2022 (TATOLI)— João Coreia, eleitu sai Prezidente Federasaun Wushu Timor-Leste (FWNTL) ba períodu 2022-2026, liuhosi kongresu datoluk ho tema “Reforsa no Hametin Organizasaun Hodi Lori Prospero Unidus no Lori WUSHU ba Kompetisaun Internasionál”, ne’ebé hala’o iha edifísiu FWTL Bairru-Pité, foin lalais ne’e.

João Coreia sai vensedór ho votu maioria 28, liuhosi prosesu demokrátiku ne’ebé kongresista sira aprezenta pakote tolu mak hanesan João Coreia, Mateus de Jesus no Cornelio Barreto.

Liuhosi votasaun sekretu ne’e, kongresista sira fó votu konfiasaan ba João Coreia mak avansa ba Prezidente ho votu 28, Mateus de Jesus votu ida no Cornelio Barreto votu 14.

Hafoin eleitu, Prezidente João Coreia, hateten sei tau prioridade ba Asosiasaun-sira no klubu sira hodi promove atleta ba selesaun Nasionál atu sai kampionatu Nasionál.

“Ha’u nia mandatu sei buka meiu oi-oin atu lori WUSHU ba oin no ami mós rekoñese iha difikuldade iha orsamentu, transporte no buat seluk seluk tan.Tanba ita nia assosiasaun no klubu sira iha munisípiu no balun iha área remota,”Prezidente eleitu ne’e hateten liuhosi nota ne’ebé Agência TATOLI, kuarta ne’e.

“Ba oin ami sei koopera ho Sekretáriu Estadu Juventude no Desportu (SEJD) no Konfederasaun Desportiva Timor – Leste (CDTL), atubele apoia finanseiru hodi dezenvolve Federasaun ne’e,” refere nota ne’e.

Entretantu, Prezidente CDTL Macário F. Sanches, hato’o apresia no kongratula  Prezidente eleitu ho nia estrutura sira no enkoraja prezidente eleitu atu halo servisu ne’ebé másimu lori federasaun ne’e ba oin.

“Presiza fortalese no lori federasaun di’ak liu iha futuru, ha’u mós rona federasaun WUSHU iha nia asosiasaun 11 iha munisípiu ida ne’e di’ak tebes no sei nabilan liután iha futuru atubele prodús joven feto ho mane sai atleta ne’ebé mak kualifikadu iha Timor-Leste,” nia afirma.

Prezidente CDTL ne’e sujere ba federasaun WUSHU kongresu remata atu bele lori federasaun no disemina informasaun ba iha eskola no fatin hotu atu nune’e atrai juventude hodi partisipa iha Federasaun WUSHU.

Kongresu ne’e partisipa másimu hosi nia asosiasaun hamutuk 11 ne’ebé mai hosi Munisipiu sira iha territóriu nasionál.

Jornalista: Hortencio Sanchez

Editór      : Florencio Miranda Ximenes

Publisidade

Leave a Reply

Latest Post

error: Content is protected !!