Komisáriu Faustino apresia serbisu ekipa SIP, SNI no J2

DILI,11 agostu 2022 (TATOLI)— Komandante Jerál Polisia Nasionál Timor-Leste (PNTL), Komisáriu Faustino da Costa, hato’o kongratulaia no apresiasaun ba serbisu ekipa hosi Serbisu Informasaun Polísia (SIP), Servisu Nasionál Intelejénsia (SNI) no Serbisu Informasaun Militár (SIM ka J2), tanba serbisu hamutuk ho di’ak hodi halo detensaun ba suspeitu-sira ba kazu motór lakon no apreensaun ba objetu krime-sira.
“Ha’u fó parabéns ba ekipa hotu tanba kuandu simu informasaun no halo lalais identifikasaun hodi buka tuir suspeitu sira ba kazu motór lakon sira, la’os de’it ba motorizada, maibé ba mós sasan eletróniku sira seluk ne’ebé lakon,” Komandante Jerál, PNTL Komisáriu Faustino da Costa, hateten ba jornalista sira iha Kuartél Jerál PNTL, Kinta ne’e.
Komisáriu Faustino mós louva serbisu SIP SNI no J2 tanba komesa halo sira nia serbisu ba to’o munisípiu hodi buka tuir sasan komunidade ne’ebé maka lakon iha Dili no konsege hetan fali.
Nune’e, Komandante PNTL ne’e enkoraja ekipa SIP kontinua serbisu hamutuk ho parte SNI no J2 hodi prevene krime sira ne’ebé mosu iha sosiedade nia le’et.
“Ha’u orienta imi atubele halo baze dadus ida kona-ba motór no karreta sira liuliu nia-tipu atu iha dadus serteza nune’e ita bele prevene sasan importasaun ilegál sira iha ita nia rain,” nia afirma.
Jornalista: Natalino Costa
Editór : Florencio Miranda Ximenes

