DILI, 11 agostu 2022 (TATOLI)— Ministru Prezidensia Konsellu Ministru, Fidelis Manuel Leite Magalhães, kinta ne’e, inaugura Sentru Integradu Jestaun Informasaun Kriminál (CIGIC,sigla Portugés) no Informasaun Téknolojia (IT) ba Polisia Nasionál Timor-Leste (PNTL) ne’ebé konstrui hosi Austrália liuhosi Timor-Leste Police Development Program (TL-PDP).
Edifísiu rua ne’e, inaugura hosi Ministru Prezidensia Kosellu Ministru, Fidelis Manuel Leite Magalhães ne’ebé reprezenta Primeiru Ministru no Ministru Interiór, Taur Matan Ruak, ne’ebé akompaña hosi Embaixadór Austrália iha Timor-Leste, Bill Costelo no Komandante PNTL, Komisáriu Faustino da Costa.
“Ho apoiu konstrusaun edifisiu rua ne’e nu’udar pasu pozitivu hosi prontidaun Governu Austrália ne’ebé hatudu ba Polisia Nasionál Timor-Leste (PNTL) liuliu hakarak ajuda duni dezenvolve institituisaun PNTL ba futuru ne’ebé di’ak liután. Nune’e, parte Governu agradese tebes ba apoia ne’e,” Ministru Fidelis Magalhães hateten iha ámbitu inaugurasaun edifisiu rua ne’e iha Kuartél Jerál PNTL-Caicoli, kinta ne’e.
Governante ne’e husu PNTL atu kontinua hatudu profizionalizmu no serbisu ho responsablidade atubele garante seguransa ba ema hotu no presiza aposta ba rekursu umanu hodi dezenvolve instituisaun PNTL ba futuru ho di’ak liután.
VIII Governu Konstituionál ne’ebé lideradu hosi Primeiru Ministru, Taur Matan Ruak la taka matan ba institusaun PNTL nune’e aprova ona lei orgánika PNTL, hasa’e remuneratóiu ka saláriu báziku membru PNTL nian ba 15% no aprova ona estatutu PNTL nian.
“Governu halo ne’e atu motiva membru PNTL sira kontinua hatudu profisionalizmu iha serbisu ho responsablidade,” Governante ne’e enkoraja.
Iha biban hanesan, Embaixadór Austrália iha Timor-Leste, Bill Costelo, hateten Governu Austrália kontinua iha komitmentu apoia dezenvolvimentu polísia iha futuru.
“Tanba to’o agora governu Austrália apoia ona Timor-Leste liuliu iha área seguransa hamutuk millaun $20 ona, tanba ne’e ami sei kontinua apoia PNTL atu dezenvolve di’ak liután iha futuru,” nia kompromete.
Embaixadór ne’e mós konpromete katak sei kontinua apoia PNTL nian iha área rekusu umanu hanesan kontiua haruka membru PNTL ba formasaun iha Austrália.
Entretantu, Komandante Jerál PNTL, Komisáriu Faustino da Costa, hato’o agradesementu ba Governu Austrália liuhosi TLPD tanba apoiu PNTL hodi konstrui tan edifisiu rua ne’e hodi fasilita serbisu PNTL.
Sentru Integradu Jestaun informasaun Kriminál ne’e hahú inisiakonstrusaun iha 2019, ne’ebé mak liuhosi diskusaun ho Xefe Polisia Nasionál Servisu Investigasaun Kriminál Nasionál (PNSIK), Superientidente Polisia Jorge Monteiro no Komandante sesante TLPDP. Enkuantu konstrusaun edifisiu Informasaun Téknoloji ne’e tanba iha 4 abríl 2021 Kuartél Jerál PNTL hetan mós inudasaun.
“Ho Kondisaun sira liña internet hetan estragu labele funsiona, nune’e ha’u informa ba Primeiru Ministru hanesan mós Ministru Interiór no orienta ha’u hodi buka parseiru bele konstrui edifisiu ida, ho nune’e TLPD konkorda hodi konstrui edifisiu ida ne’e,” nia agardese.
Tuir observasaun jornalista TATOLI nian iha tereñu hatudu edifisiu Informasaun Téknolojia kompleta ho rede internet no iha sentru kamara vizilánsia ka CCTV ne’ebé ajuda Komandu PNTL nia servisu deteta krime sira ne’ebé mosu iha iha Dili no munisípiu hanesan Baucau, Bobonaro, Maliana, Batugade liuliu ema tama sai ilegál.
Enkuantu, Sentru Integradu Jestaun Informasaun Kriminál, kompleta ho sala investigasaun, sala laboratóriu, sala forensic, sala ateimetu ba vitima labarik no sala detensaun.
Jornalista: Natalino Costa
Editór : Florencio Miranda Ximenes
