Eskola São José Operáriu sei realiza ezame remediáriu ba estudante sira
DILI, 12 agostu 2022 (TATOLI)–Eskola Ensinu Báziku Koléjiu São José Operáriu (SJO) Balide sei realiza ezame remediáriu no ezame segundu xamada ba estudante sira ne’ebé hetan valór ladi’ak inklui sira ne’ebé la tuir ezame iha períodu daruak.
Diretór Eskola Koléjiu SJO, Anacleto da Costa, relata, totál estudante hamutuk 600 resin, maibé eskola sei fó toleránsia bazeia ba regra eskola katak estudante sira ne’ebé maka hetan nota ladi’ak iha ezame períodu daruak sei tuir fali ezame remediáriu.
“Segunda agora ami sei loke fali oportunidade daruak durante loron-tolu ba estudante ne’ebé hetan nota negativa, ne’ebé sira-nia valór labele prenxe iha kaderneta eskolár atu mai tuir fali ezame remediáriu,” Diretór eskola informa ba Agência Tatoli, iha ninia knaar fatin, Balide, sesta ne’e.
Notísia relevante: Estudante ESJ Finantil balun laiha karteira eskolár partisipa ezame períodu daruak
Tuir Diretór, ezame remediáriu ne’e bazeia de’it ba nota sira ne’ebé ladi’ak, atu nune’e estudante sira mai hadi’a fali iha segundu oportunidade hodi prenxe ba kaderneta eskolár.
“Ami loke oportunidade ba estudante sira ne’ebé moras ka iha problema iha semana kotuk no la tuir ezame períodu daruak, atu mai tuir fali ezame segundu xamada. Atividade sira ne’e hotu sei realiza iha loron 15 agostu 2022,” nia akresenta.
Enkuantu, ezame períodu daruak ne’ebé realiza iha Eskola Koléjiu SJO Balide ne’e iha loron 08 to’o 13 agostu 2022. Tanba ne’e, estudante sira ne’ebé la tuir ezame tanba moras identifika iha estudante tolu no ba sira ne’ebé nota ladi’ak sei iha hela prosesu identifikasaun nia laran.
Maski nune’e, buat hotu la’o ho di’ak fano silidade ba estudante sira hanesan sala aula inklui karteira sufisiente.
Tuir observasaun Agência Tatoli iha terrenu, nota katak durante ezame, kuaze estudante sira hotu utiliza sala aula inklui kadeira no meza, distánsia entre estudante ida dook malu atu evita estudante sira halo kopia ba malu no mós fasil ba profesór sira atu halo kontrola.
Jornalista : Tomé Amado
Editora : Julia Chatarina
