Selebra referendu ba dala-XXIII, Riak Leman husu joven hametin pás-estabilidade
DILI, 17 agostu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidál de Jesus ‘Riak Leman’, hateten iha selebrasaun konsulta popular (referendu) ba dala-XXIII ne’e, presiza joven sira-nia kontribuisaun hodi hametin unidade, pás no estabilidade iha Timor-Leste.
Notísia Relevante: Governu aloka rihun $100 komemora loron Konsulta Populár ba dala-XXIII
“Loron konsulta populár ba dala-XXIII, husu joven hotu-hotu hodi hamutuk ho Estadu atu hametin pás, unidade no estabilidade ba ita-nia nasaun no rai doben ida-ne’e,” Riak Leman hateten ba Agência Tatoli, realsiona ho komemorasaun loron konsulta popular ba dala-XXIII ho tema “Ho espiritu loron konsulta populár 30 agostu 1999 mai ita hametin pás no estabilidade ba dezenvolvimentu iha ita-nia rai Timor Leste”, iha nia knar fatin Comoro, Dili.
Atu di’akliu, nia dehan, unidade tenke metin no joven sira ka ema hotu-hotu hamutuk lolo liman ba malu hodi asegura pás no estabilidade iha Timor-Leste.
“Tanba ne’e, tempu ona joven no populasaun sira tenke kria pás hodi timoroan sira hamutuk halo dezenvolvimentu ba ita-nia rain, hodi hamenus mukit ba populasaun sira-ne’ebé sei moris terus tanba bainhira laiha pás mak dezenvolvimentu mós sei la la’o,” nia dehan.
Riak Leman hateten, durante ne’e pás la’o di’ak hela maibé dezenvolvimentu mak haree ladún la’o tanba realidade ne’ebé iha katak Governu mós truka hela de’it no orsamentu sumba depois pandemia COVID-19.
“Entaun ita bele dehan dezenvolvimentu labele la’o lais tuir ita-nia hakarak, maibé la’ós la la’o hotu, iha balun la’o no iha fatin balun ne’ebé labele la’o tanba situasaun,” nia hateten.
Maske Timor-Leste ukun rasik-an to’o tinan 20-resin ona maibé sei iha dezafiu ne’ebé populasaun enfrenta.
“Tanba ne’e, agora funu hotu, depois futuru ita-nia objetivu mak atu hadi’a povu nia moris, redús ki’ak iha ita-nia rain, mak presiza loke kampu traballu ba joven sira,” nia dehan.
Vidal de Jesus haktuir, tanba iha momentu ne’ebá (1999) Timor-Leste iha situasaun defisil no terus nia-laran, tanba pro-autonomu sira sempre halo konfrontu no tiru populasaun arbiru inklui estraga sasán.
“Iha momentu 30 agostu ne’ebá, situasaun defísil tebes tanba mosu hela konfrontu entre pro autonomia ho prindependénsia. Maibé ami reprezentante Falintil sempre tama ho pás no estabilidade iha situasaun ne’e, atu oinsá ita bele halo eleisaun ho di’ak no ikus ita hetan indenpendénsia mak ita tenke hakalma situasaun. Nune’e ita bele atinje ita-nia objetivu katak mate ka moris tenke ukun rasik-an,” nia esplika.
Tuir dokumentu istóriku ne’ebé Agência Tatoli sira hosi relatóriu Comissão de Acolhimento, Verdade e Reconciliação de Timor Leste (CAVR-TL) ho titulu “Chega!” ne’e haktuir katak, iha loron 30 agostu 1999 nu’udar lorom memória istóriku ida ba Timor-Leste, tanba maske hasoru intimidasaun no violasaun oioin, iha loron ida-ne’e povu iha territóriu Timor-Leste, Indonézia, Austrália no Portugál sai hosi uma nakonu ho esperansa hodi fó sira0nia votu ba opsaun atu hamutuk ho Indonézia ka haketak an hosi Indonézia.
Sentru votasaun ba Konsulta Populár (30 agostu 1999) hamutuk 200 mak estabelese iha territótiu Timor laran tomak. Totál populasaun ne’ebé rejistu atu vota hamutuk 451,792 no hosi totál populasaun ne’e, 98,5% ba mak vota iha sentru votasaun.
Notísia Relevante: Konsulta Populár 1999, David Mandati telefone Xanana Gusmão iha Cipinang
Jornalista : Osória Marques
Editór : Cancio Ximenes
