DILI, 18 agostu 2022 (TATOLI)—Prezidente Konsellu Kombatente Libertasaun Nasionál (CCLN-sigla portugés), Vidál de Jesus ‘Riak Leman’, hateten konseitu rekonsiliasuan ne’e hahú hosi Kay Rala Xanana Gusmão no rekonsiliasaun iha aspetu ida-ne’ebé mak pozitivu tebes.
Notísia Relevante: Selebra referendu ba dala-XXIII, Riak Leman husu joven hametin pás-estabilidade
Riak Leman hateten lia hirak ne’e, nakait ho polítika Estadu atu halo rekonsiliasaun entre timoroan sira iha Timor Osidentál no timoroan sira iha Timor-Leste no Governu Timor-Leste atu selebra loron Konsulta Populár (referendu) ba dala-XXIII (30 agostu 1999-30 agostu 2022) ho tema “Ho espiritu loron konsulta populár 30 agostu 1999 mai ita hametin pás no estabilidade ba dezenvolvimentu iha ita-nia rai Timor-Leste”.
“Ha’u hanoin ko’alia kona-ba rekonsiliasaun ne’e aspetu ne’ebé mak pozitivu tebe. Rekonsiliasuan ne’e hahú hosi Maun Boot Kay Rala Xanana Gusmão no ita hotu hakarak rekonsiliasaun ne’e,” Riak Leman hateten ba Agência Tatoli, iha nia kna’ar fatin Comoro, Dili.
Tanba, nia dehan, rekonsiliasuan ne’e dalan ida-ne’ebé mak di’ak tebes, tanba bele halo belun di’ak ho nasaun viziñu sira hanesan Indonézia no Austrália, maibé tuir istória ne’e katak Indonézia mak invade Timor-Leste nune’e povu Timor-Leste mate barak maibé Indonézia mós mate barak hotu mezmu sira invade TL.
“Mezmu sira mai invade ita no ita mate barak maibé ita tenke kria amizade ida ho ita-nia nasaun viziñu sira hanesan Indonézia, nune’e iha parte ekonómia nian ita bele halo importasaun no esportsaun sasán entre nasaun rua nian,” nia dehan.
Maibé atu ko’alia kona-ba timoroan iha Timor Osidentál ne’e, nia dehan, se sira-ne’ebé hela iha Timor Osidentál ne’e sente-an timoroan hakarak fila laiha impedementu ba sira.
Notísia Relevante: PN aprova rezolusaun adota deklarasaun Pás Mundiál ho unanimidade
“Ita la tau obstákulu no impedimentu, sira-ne’ebé mak hakarak fila ne’e fila mai ita hamutuk. Se nia sente katak nia timoroan entaun nia fila ba nia rain hodi moris ho nia família iha ria ida-ne’e,” nia hateten.
Tuir informasaun katak timoroan sira-ne’ebé hela iha Timor Osidentál, moris terus no defisil tanba bainhira sira halo toos no natar ne’ebé mak hasai produtu di’ak, entaun rai-ni’in sira hadau tiha tanba rai bokur ona.
“Nusa la hela ita-nia rain hodi uza no hela ita rai rasik, nune’e bele halo servisu hodi sustenta ba ita-nia família uma-laran no ita hamutuk hodi dezenvolve ita-nia rain ba iha futuru ne’ebé mak di’ak no armonia,” nia dehan.
Husu kona-ba rekonsiliasaun ne’ebé mak Prezidente Repúblika hala’o ne’e relevante iha biban ukun rasik-an nia-laran, nia esplika, uluk iha funu no iha inimigu entre nasaun rua ne’e maibé agora buka dalan para sai amigu.
Ko’alia kona-ba timoraoan iha Timor Osidentál mak sai ona sidadaun Indonézia, Riak Leman haktuir katak ema hotu-hotu iha direitu atu hili tuir nia dalan no laiha ema ida mak obriga fali ema ida.
“Ida-ne’e ba ita susar uitoan tanba nia sai ona sidadaun Indonézia. Keta nia hanoin dehan iha Indonézia moris di’ak ona karik nusa mak mai tan Timor. Sira iha ne’ebá mak deside atu ba ne’ebé, mai Timor ka nafatin iha Indonézia,” nia hateten.
Iha komemorasaun loron Konsluta Populár ba dala-XXIII ne’e, nia hateten, loron referendu ne’e loron ida-ne’ebé mak lori raan ho ruin mak hodi lori Timor-Leste manán ukun rasik-an.
Tanba ne’e, nia husu agora no ba oin timoroan sira tenke hamutuk hodi kria pás no dame iha Timor-Leste tanba timoroan terus no susar natoon ona iha momentu ne’ebá, nune’e husu joven atu banati tuir saida mak lider sira halo ona ba rai ida-ne’e iha momentu ne’ebé difisil nia-laran liu-liu iha loron 30 agostu 1999.
Notísia Relevante: Alkatiri: “Referendu riku ho rekonsiliasaun maibé ita ho ita la rekonsilia malu”
PN apoiu Horta halo rekonsiliasaun ho timoroan iha Timor Osidentál no TL
Jornalista : Osória Marques
Editór : Cancio Ximenes
