DILI, 19 agostu 2022 (TATOLI)–Diretór Servisu Edukasaun Munisípiu Baukau (DSEMB), Augusto Hornai Ximenes, relata katak estudante finalista kompostu hosi nível ensinu tolu hosi Baucau prepara ona atu partisipa iha ezame nasionál.
“Ita iha ona dadus jerál estudante finalista hosi ensinu báziku terseiru siklu 9o ano, estudante hamutuk 5.949 hosi ensinu sekundáriu jerál (ESJ) no ensinu sekundáriu tékniku vokasionál (TEKVOK) ne’ebé atu tuir ezame nasionál iha tinan akadémiku 2022,” Diretór informa ba Agência Tatoli, via telefónika, sesta ne’e.
Totál dadus jerál ne’ebé rekolla iha mós klasifikasaun ba dadus hosi ensinu báziku terseiru siklu 9o ano iha estudante finalista 3.355 kompostu hosi mane 1.615 no feto 1.640, ESJ iha 2.345 kompostu hosi mane 1.058 no feto 1.287, no TEKVOK iha 249 kompostu hosi mane 137 no feto 112.
Notísia relevante: Servisu Edukasaun Viqueque rejista kandidatu finalista ezame nasionál na’in-3.296
Aleinde ne’e, DSEMB prepara ona fatin atu realiza ezame nasionál hamutuk 50, kompostu ensinu báziku terseiru siklu 9o ano iha sentru hamutuk 30, ESJ iha 16 no TEKVOK iha sentru hamutuk haat, atu nune’e bele responde ezame nasionál ne’ebé sei realiza iha loron 24 outubru tinan ne’e.
Tuir Diretór, fasilidade mobiliáriu ba ezame seidauk sufisiente tanba sei iha eskola balun enfrenta hela problema inklui sala aula menus. Tanba ne’e sempre afeta ba mobiliáriu mós menus, ne’ebé hosi eskola sira enfrenta problema ne’e inklui Eskola ESJ 01 Baucau tanba númeru estudante 639.
“Eskola ne’e kuaze tinan-haat ona sempre hasoru problema tanba sira-nia númeru estudante boot, entaun ita sempre empresta hela de’it Eskola EBF balun hodi koloka estudante ESJ 01 ba iha ne’ebá,” nia akresenta.
Iha Eskola ESJ 01 Baucau ne’e ninia sala aula ne’ebé eziste iha de’it 12, kuandu haree ba totál estudante 639 maka fahe kada sala aula iha estudante 20, nune’e presiza tan sala aula 31.
DSEMB hahú halo ona levantamentu dadus liuhosi rekolla nota estudante hosi ezame períodu dahuluk to’o oitavu nian atu submete ba Gabinete Avaliasaun Dezenvolvimentu Kurríkulu MEJD nian, ne’ebé fó orientasaun katak tarde liu maka loron 01 setembru 2022 prosesu hotu tenke tama ona atu gabinete hodi bele hatama ba sistema ezame nasionál.
Iha ona dadus estudante finalista hamutuk 26.371 maka públika ona ba públiku, kompostu hosi estudante Dili, Liquiçá, Manufahi no Viqueque, ne’ebé hosi Viqueque ho totál estudante 2.942 kompostu hosi ensinu báziku terseiru siklu iha 1.693, ESJ iha 1.121 no TEKVOK iha 128.
Hosi munisípiu Manufahi ho totál estudante finalista hamutuk 2.931, kompostu hosi ensinu báziku terseiru siklu iha1.586, ESJ iha 1.108 no TEKVOK iha 237, hosi Viqueque iha 3.296, kompostu hosi ensinu báziku terseiru siklu iha 1.897, ESJ iha 1.306 no TEKVOK iha 93, munisípiu Dili estudante finalista iha 17.195 kompostu hosi ensinu báziku terseiru siklu iha 7.007, ESJ iha 9.058 no TEKVOK iha 1.130.
Jornalista : Tomé Amado
Editora : Julia Chatarina
