DILI, 22 agostu 2022 (TATOLI) – Vise Prezidente Komisaun Organizadora ba Kampionatu Nasionál Federasaun Sorinji Kempo Timor-Leste (FSKTL), Adão Pinto, hateten semana ne´e sei realiza kampionatu atu bele hili no haree atleta ne’ebé kualifikadu hodi prepara ba eventu internasionál sira.
Atividade kampionatu ne’e sei hala´o iha Zináziu Dili durante loron rua hahú iha dia 26 to´o 27 agostu.
“Agora ami prepara hela dokumentu hotu hodi halo preparasaun ba kampionatu ne’e rasik, orsamentu apoiu hosi Sekretariu Estadu Juventude no Desportu (SEJD) hamutuk $9000-resin”, dehan Adão ba Ajénsia TATOLI iha Zinajiu Dili, segunda ne’e.
Partisipa iha eventu ne’e atleta hosi assosiasaun sira iha munisipiu lima mak hanesan Lautem, Baucau, Dili, Ermera no Bobonaro ho total atleta hamutuk na’in 100 mak rezistu ona iha komisaun organizadora.
Tuir dadus ne’ebé iha, membru FSKTL ne’ebé sei ativu hamutuk na’in 500-resin.
Notísia relevante : Atleta Kempo 75 Tuir Kampionatu Nasionál
MEJD Apresia FSKTL Realiza Kampionatu Nasionál
Atleta Kempo 75 Tuir Kampionatu Nasionál
Jornalista: Hortencio Sanchez
Editór : Zezito Silva
