iklan

EKONOMIA, HEADLINE

La’o Hamutuk husu Governu investe maka’as iha área agrikultura

La’o Hamutuk husu Governu investe maka’as iha área agrikultura

Natar iha Atabae. Imajen Tatoli/António Gonçalves

DILI, 22 agostu 2022 (TATOLI)—Organizasaun Naun Governamentál (ONG) La’o Hamutuk husu Governu halo investimntu maka’as iha área agrikultura hodi garante sustentabilidade fundu petrolíferu.

“Governu presiza halo investimentu iha área agrikultura tanba atu garante sustentabilidade ekonomia iha nasaun ida-ne’e Governu tenke uza osan hosi fundu Petrolíferu hodi investe ba setór produtivu sira ne’ebé mak tuir loloos importante tebes nu’udar ekonomia ba nasaun nian,” Peskizadór ba Asuntu Agrikultura, Ekonomia no Direitu ba Rai iha La’o Hamutuk, Mariano Ferreira, hateten ba Agência Tatoli, foin lalais ne’e, iha ninia knaar fatin, Bebora.

Timor-Leste nia ekonomia durante 20 hanesan ne’e kuaze depende 90% ba fundu petrolíferu hodi dezenvolve nasaun laran.

“Ami hanoin, ita tenke uza ona osan hosi fundu petrolíferu atu investe ba setór sira hanesan agrikultura, tanba maioria populasaun moris iha munisípiu área rurál ne’e hotu hala’o atividade hanesan agrikultura, pekuária, no peska,” nia akresenta.

Nune’e, nia konsidera Governu presiza investe iha área agrikultura tanba tuir sensu agríkola tinan 2019, hatudu katak 70% populasaun ne’ebé moris iha área rurál iha família 69% mak moris iha área agrikultura.

“Ho informasaun hirak ne’e, tuir loloos bele ona dezenvolve ita-nia setór agrikultura ne’e di’ak liután. Aleinde ne’e, presiza mós investe iha área indústria, kooperativa no turizmu,” nia tenik.

Notísia relevante: Relatóriu Sensu Agríkola: Porsentu 66 Uma-Kain iha Timor-Leste Halo Atividade Agrikultura

Bazeia ba relatóriu peskiza indústria hosi La’o Hamutuk transforma produtu agrikultura iha Timor-Leste no nota katak indústria kiik barak tebes mak hala’o atividade produsaun hanesan transforma hudi no talas sai ba kripik, ai-fuan halo marmelada, no bani-been ne’ebé transforma ba embalejen ne’ebé di’ak, maibé seidauk hetan apoiu di’ak hodi halo investimentu.

Tuir sosiedade sivil, setór indústria transformadora produtu agríkola ne’e importante tebes atubele dezenvolve no inklui setór privadu bele halo investimentu, atu nune’e bele promove di’ak liután Timor-Leste nia ekonomia hosi naun petrolíferu.

“Setór seluk mak kooperativa hanesan agrikultura, peska, pekuária no artezenatu sira hanesan parte ida hosi ita-nia ekonomia ne’ebé mak bele ajuda ekonomia populasaun no bele fó kampu serbisu ba komunidade,” nia hateten.

Peskizadór ne’e haree mós katak, Governu mós bele investe iha setór turizmu ne’ebé poténsia tebes tanba durante situasaun COVID-19, iha juventude barak mak hatudu vontade atu dezenvolve setór turizmu sira iha fatin oioin, maski ho kapasidade kiik maibé sira organiza-an atubele promove.

“Ida-ne’e hanesan poténsia Governu ka setór privadu atubele investe no dezenvolve di’ak liután nune’e kria polítika lei ruma atu apoiu dezenvolvimentu hirak ne’e,” nia aumenta.

Ba setór edukasaun no saúde mós importante tebes tanba ba futuru Timor-Leste presiza ema ho kualidade di’ak no ema tenke iha nutrisaun no saúde di’ak.

Durante ne’e, La’o Hamutuk haree ba investimentu iha área potensiál tinan-lima ba kotuk, iha investimentu ba setór produtivu ne’e ladún a’as hanesan iha área agrikultura komunidade maioria mak moris ho agrikultura no kada tinan Governu aloka orsamentu ba Ministériu Agrikultura no Peska (MAP) atu promove setór agrikutura ne’e mós kiik tebes, ne’ebé hatudu katak Governu ladún tau prioridade.

Atu garante sustentabilidade ba fundu petrolíferu ne’e rasik kontribuisaun liña ministeriál ne’e importante tebes tanba iha tinan balun liubá kotuk entre liña ministeriál estabelese ona Kosellu Nasionál Seguransa no Soberania Alimentár no Nutrisaun iha Timor-Leste (KONSSANTL), ne’ebé iha ministériu relevante lubuk ida inklui ajénsia sosiedade sivil.

“Servisu liña ministeriál ne’e importante tebes tanba bainhira ko’alia kona-ba problema agrikultura ne’e liga ho problema infraestrutura, bee-moos, estrada no seluk tan ne’ebé presiza duni koordenasaun di’ak entre liña ministeriál,” nia salienta.

Alokasaun Orsamentu Jerál Estadu (OJE) tinan 2022 ba MAP hamutuk $23.592.218, ne’ebé fahe ba karegória lima hanesan saláriu no vensimentu $5.064.400, bens no servisu $12.229.723, kapitál menór $3.697.975, kapitál dezenvolvimentu $2.205.120, no transferénsia públiku $395.000.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!