DILI, 22 agostu 2022 (TATOLI) – Diretora Nasionál Alta Kompetisaun Sekretariu Estadu Juventude no Desportu (SEJD), Maria Luisa Monteiro, hateten proposta ne’ebé mak federasaun desportiva submete mai SEJD kona-ba pedidu disponibilidade apoiu orsamentu ba kampionatu nasionál tama ona iha faze final verifikasaun nian.
“Proposta tinan ida ne’e ba kampionatu nasionál sira ne’ebé mak federasaun desportiva sira atu realiza, ita prosesu no halo verifikasaun hotu ona no federasaun balun mak sei halo abertura iha tempu besik”, dehan Diretora ne’e ba Ajénsia TATOLI iha edifísiu SEJD Dili, ohin.
Federasaun desportiva hirak ne´e mak Taekwondo no realiza ona kampionatu, Atletizmu realiza ona, Kempo sei realiza iha tempu besik, Muatai no Boxe seidauk hala´o.
Totál orsamentu ne’ebé SEJD prepara hodi apoiu ba federasaun desportiva hirak ne’e besik $15.000.
Enkuantu, federasaun seluk hanesan Voleiból no futeból hala´o atividade la´os kampionatu nasionál maibé kategoria liga ho durasaun ne’ebé naruk maibé parte rua ne’e seidauk submete proposta ba SEJD hodi apoiu ba sira nia atividade.
“To´o agora Violeiból no futeból seidauk hatama sira nia proposta mai atu ita bele haree no define los montante orsamentu hira mak ita atu apoiu ba sira nia atividade, Voleiból uluk ne’e hatama sira nia proposta mai, maibé sekretariu estadu hakarak lori voleiból ne’e ba to´o iha baze hodi hala´o jogu hotu iha baze, ida ne’e mak iha mudansa ba sira nia proposta too agora proposta foun sira seidauk lori mai hatama atu ami bele hare no tetu”, konklui.
Jornalista: Hortencio Sanchez
Editór : Zezito Silva
