Janeiru to’o agostu, PNTL rejista kazu asidente tráfegu 1.811 no óbitu 61

DILI, 24 agostu 2022 (TATOLI)— Tuir dadus estatístika hahú hosi fulan-janeiru to’o agostu, Polisia Nasionál Timor-Leste (PNTL), rejista kazu asidente trafégu iha territóriu nasionál hamutuk 1.811, hosi númeru ne’e na’in-61 mak lakon vida.
Hosi totál kazu asidente tráfegu 1.811 ne’e kompostu hosi kanek grave 289, kanek kamaan 1.522 no óbitu na’in-61
“Kazu asidente tráfegu hira ne’e akontese ba sidadaun sira ne’ebé kondús karreta ho motór halai la kontrola-aan hakarak ansi atu to’o lalais ho kazu sira, balun kontra kódigu Estrada no balun mós hetan asidente tanba ho kondisaun lanu,” katak Portavós Komandu Jerál Polisia Nasionál Timor-Leste (PNTL) Superintendente Xefe Armando Monteiro, ba jornalista sira liuhosi konferensia imprensa iha Kuartél Jerál PNTL,Caicoli, kuarta ne’e.
Atu prevene asidente tráfegu, Portavóz ne’e dehan PNTL hanesan autoridade seguransa nafatin husu ba sidadaun sira ne’ebé uza transporte públiku no privadu bainhira halo viajen bá-mai tenke kontrola aan, labele ansi atu halai ho velosidade inklui kumpre kódigu estrada.
“Ita husu ba sidadaun se deit iha kareta ho motór bainhira viajen respeita lei kódigu estrada, se bainhira kondus motór tenke uza kapasete, atu bele salva imi nia vida ka tau importasia ba seguru da vida, tanba ita ema la faan hanesan kareta ho motór, mate ne’e hotu ona,” nia ekoraja.
Kazu krime hamutuk 2.359
Alende ne’e, Superientendente Xefe Armando Monteiro, informa hahú fulan-janeiru to’o to’o agostu PNTL rejista kazu krime 2.359.
“PNTL rejista kazu krime hamutuk 2.359 mak akontese iha teritóriu nasionál,no kazu sira ne’e ita submete ona ba iha Ministériu Públiku anu’udar nain ba asaun penál,” Portavós ne’e akresenta.
Kazu krime hirak ne’e kompostu hosi kazu ofensa integridade fíziku simples, violénsia Doméstika, danu simples, kazu asaltu.
Nune’e mós kazu rua ne’ebé maka PNTL rejista hanesan kazu bo’ot no sai preokupasaun ba iha públiku maka hanesan iha akontesimentu loron 16 agostu iha Suku Debos -Covalima, ne’ebé akontese kazu omísidu agravadu no kazu perturbasaun ordem públiku hanesan iha Munisipiu Dili ne’ebé akontese iha loron 19 agostu iha área Vila -Verde no Lodge-Comoro nian.
“Husu nafatin ba públiku no sosiadade atu kria dame ho hamatek atu ema hotu livre halo servisu iha pás no estabilidade nia laran hodi dezenvolve Timor-Leste,” nia afirma.
Atu evita kazu asidente no insidente mak PNTL nu’udar autoridade seguransa prontu halo servisu iha oras 24 atu atende ba kazu saida de’it ne’ebé maka akontese iha Timor-Leste.
Jornalista: Natalino Costa
Editór : Florecio Miranda Ximenes

