iklan

EKONOMIA, HEADLINE

MTKI no UNWTO implementa projetu empoderamentu feto no rekuperasaun turizmu

MTKI no UNWTO implementa projetu empoderamentu feto no rekuperasaun turizmu

Vise-Ministra Turizmu Komunitáriu Kulturál, Inácia da Conceição Texeira, hasai foto hamutuk ho parseiru hafoin atividade workshop iha CCD, kuarta (24/08). Imajen Tatoli/Cidália Fátima

DILI, 24 agostu 2022 (TATOLI)—Ministériu Turizmu Komérsiu no Indústria (MTKI) kolabora ho Organizasaun Mundiál Turizmu ONU (UNWTO), kuarta ne’e, implementa projetu ho títulu ‘empoderamentu feto no rekuperasaun turizmu Timor-Leste’.

Vise-Ministra Turizmu Komunitáriu Kulturál, Inácia da Conceição Texeira, hateten, objetivu projetu mak atu hamenus impaktu krize COVID-19 ba feto emprezariál no ninia funsionáriu sira iha setór turizmu hodi hasa’e kontribuisaun turizmu ba igualdade jéneru no empoderamentu feto sira.

“Atividade ohin hanesan preliminár asesmentu, oinsá feto nia papél iha área turizmu liuliu atu fó empoderamentu hodi bele hola rasik preokupasaun no problema liuliu ba nesesidade kapasitasaun ne’ebé sira presiza liután bainhira serbisu iha área turizmu, tanba problema ida mak falta formasaun disponível ba feto sira ne’ebé serbisu iha setór turizmu,” Vise-Ministra hateten iha Sentru Konvensaun Dili (CCD, sigla portugés).

Notísia relevante: Governu la aprezenta tais iha Expo Dubai ne’e MTKI nia responsabilidade

Nia dehan, prelimináriu asesmentu ne’e bazeia ba relatóriu ne’ebé UN women aprezenta, katak iha área turizmu feto barak serbisu maibé hasoru dezafiu, entaun MTKI no organizasaun mundiál turizmu hili dezafiu lima ka neen hodi  haree kapasitasaun, nune’e bele ajuda feto sira fó formasaun hodi transforma karreira ne’e la’ós iha área operasaun de’it maibé mós lidera pozisaun balun iha área turizmu futuru.

“Kapasitasaun ne’e atu asegura katak feto sira bele hetan benefisiu di’ak liuhosi rekuperasaun turizmu no sira-nia direitu hetan protesaun, tanba dezafiu neen ne’ebé sira hasoru mak ema barak serbisu iha área turimzu liuliu feto maibé dalaruma la kompreende turizmu ne’e saida, estígma, kapasitasaun, formasaun, no seluk tan,” nia akresenta.

Nune’e, liuhosi prelimináriu asesmentu ne’e atu identifika área saida mak presiza halo formasaun, nune’e bele husu rekomendasaun ba feto empoderamentu sira ne’ebé mak iha.

“Bainhira ita hatene mak kolabora fali ho sentru formasaun sira hanesan ETDA, Canossa, no seluk tan hodi fó formasaun ho apoiu hanesan módulu sira hosi UNWTO,” nia tenik.

Antes ne’e, UNWTO hetan rekomendasaun hosi MTKI no hasoru malu ona ho parte relevante oin-oin, ne’ebé serbisu iha setór turizmu hanesan setór privadu, instituisaun sira ne’ebé jere formasaun vokasionál sira ho jestaun sira, feto no mane, iha setór públiku no privadu atu hasa’e konsiénsia no kompromisu hodi suporta programa kapasitasaun no ajuda rezolve kestaun sira ne’ebé relasiona ho reforsa ba feto sira-nia oportunidade negósiu no karreira iha setór turizmu.

“Kontinuasaun hosi asesmentu ida-ne’e mak ita sei haree fali relatóriu ne’ebé sira sei hakarak tanba iha relatóriu ne’e sei iha rekomendasaun, ne’ebé ita sei uza filafali atu haree sá lakunas ka problema mak feto enfrenta iha área turizmu. Hosi ne’e mak bele fó kapasitasaun tuir alvu loloos,” nia dehan.

Iha biban hanesan, partisipante, Paula Tores, konsidera atividade ne’e di’ak tebes tanba sei kapasita feto sira iha área turizmu hodi bele susesu iha área turizmu nian.

Workshop ida-ne’e importante tebes ba ami tanba oinsá atu fó formasaun empoderamentu feto iha área turizmu nian, oinsá mak feto sira ne’ebé serbisu iha turizmu ne’e tenke suporta atu hotu-hotu bele hetan susesu,” nia salienta.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!