Jogadór klube futsal Ramelau arranka bá Tailándia partisipa kopa AFF

DILI, 31 agostu 2022 (TATOLI)– Jogadór hosi klube futeból Futsal Primeira divizaun ne’ebé sai kampiaun iha pra-liga futsal 2021, Ramelau F.C, kuarta ne’e, arranka ona bá nasaun Tailándia hodi partisipa eventu kopa ASEAN Football Federation (AFF) futsal Championship ne’ebé sei realiza tempu besik.
Iha ámbitu despedida ne’e, Sekretáriu Jerál Federasaun Futeból Timor-Leste (FFTL), Gregorio Correia, hateten, oportunidade ne’e importante tebes ba klube Ramelau, atubele reprezenta Timor-Leste ba kompete iha eventu rejionál ne’e.

“Oportunidade ida ne’e foin daluluk ba ita boot sira ka klube Ramelau hetan, ha’u hameno liafuan ida ba ne’e bele ho klube, maibé bá reprezenta Estadu Timor-Leste, nune’e tenke hamorin Timor-Leste nia naran iha eventu ne’e,” Sekretáriu Jerál ne’e, hateten iha nia intervensaun bainhira halo despedida ho Jogadór sira iha edifisiu FFTL, kuarta ne’e.
Iha biban hanesan, Adjuntu Sekretáriu Jerál FFTL, Frederico Martins, reforsa tan katak, atividade ne’e simples tanba la presiza kritéria ne’ebé barak no klube hosi nasaun 11 iha ASEAN hanesan Indonezia, Filipina, Tailándia, Singapura, Vietname, Cambodia, Laos, Myanmar, Brunei Darusalam, Malázia no Timor – Leste ne’ebé sai kampiaun iha sira nia liga mak bele partisipa.
“Atividade ida ne’e hanesan liga domestika nian katak klube ne’ebé sai kampiaun iha liga mak ba partisipa, entaun Ramelau hanesan kampiaun pra-liga iha tinan kotuk entaun hetan konvite no ami komunika kedan sira liuhusi Assosiasaun Futsal Timor-Leste (AFTL) hodi komunika fali ho Ramelau sira ho protidaun tomak atu partisipa,” nia afirma.
Entretantu, Prezidente Klube Ramelau FC, Borza Patrocino António, hato’o agradesementu no orgullu bele partisipa iha eventu rejionál ida ne’e.
“Ami klube Ramelau sente kontente no orgullu bele reprezenta Timor-Leste bá partisipa iha eventu ne’e, ami agradese ba Federasaun Futeból Timor-Leste (FFTL) nia apoia morál,” nia agradese.
Alende ne’e, agradese mós ba patrosinadór sira ne’ebé durante ne’e apoia sira klube ne’e hanesan, Banku Nasionál Komérsiu Timor-Leste (BNCTL-sigla Portugés), Mato, King construction, Emprezáriu Oscar Lima no seluk tan.
Ekipa futeból ka jogadór ne’e ne’ebé bá partisipa iha eventu ne’e hamutuk ema na’in-24 kompostu husi jogadór no ofisiál.
Eventu ne’e, Ramelau tama iha grupu B hamutuk ho klube sira hosi nasaun 11 iha ASEAN ne’e mak hanesan, Sahako hosi Vietname, Selangor Max husi Málazia.
Jornalista: Hortencio Sanchez
Editór : Florencio Miranda Ximenes

