DILI, 31 agostu 2022 (TATOLI)— Polísia Siéntifiku Investigasaun Kriminál (PCIC,sigla Portugés), halo kooperasaun ho Ministériu Asuntu Kombatente no Libertasaun Nasionál (MAKLN), hahú loke prosesu investigasaun ba kazu falsifikasaun dokumentu sai veteranu hamutuk 32.
Ministru Asuntu Kombatente no Libertasaun Nasionál (MAKLN), Júlio Sarmento da Costa ‘Meta Malik’, submete falsifika dokumentu sai veteranu hamutuk 32, ba PCIC atu halo prosesu inkéritu tanba deskonfia mosu indísiu krime.
“Daudaun ne’e, loke ona prosesu investigasaun ba kazu falsifikasaun dokumentu atu sai veteranu hamutuk 32. Tanba bazea ba iha relatóriu hosi Gabinete Inspesaun Auditória (GIA), Ministériu nian deteta katak iha indísiu krime,” Portavós PCIC, Octavio da Costa Araújo, hateten ba jornalista sira iha edifisiu PCIC-Colmera, kuarta ne’e.
Hafoin simu dokumentu ne’e hosi MAKLN, PCIC halo identifikasaun no inkéritu hodi halo auto notísia submete Ministériu Públiku atu kontinua halo estuda, hodi delega kompeténsia ba PCIC atu kontinua prosesu investigasaun.
“Ita relata ba Ministériu Públiku,hafoin Prokuradór Jerál Repúblika, haree no estuda hodi haruka fali mai PCIC atu kontinua prosesu investigasaun,” katak nian.
Notísia relevante: Falsifika dokumentu sai veteranu, na’in-sia tama prizaun
Jornalista: Natalino Costa
Editór : Florencio Miranda Ximenes
