iklan

EKONOMIA, HEADLINE

Programa rejistu móvel SERVE, I.P konsege alista empreza 500

Programa rejistu móvel SERVE, I.P konsege alista empreza 500

Diretór Ezekutivu SERVE, I.P, Florêncio Sanches. Imajen Tatoli/Jogerjo Guterres

DILI, 01 setembru 2022 (TATOLI)—Diretór Ezekutivu Servisu Rejistu no Verifikasaun Emprezariál, Institutu Públiku (SERVE, I.P), Florêncio  Sanches, hateten, programa rejistu móvel ne’ebé lansa iha loron 21 agostu tinan ne’e, konsege alista empreza 500.

“Ita foin hala’o semana ida maibé konsege rejista ona emprezáriu 500, ida-ne’e pasu pozitivu no di’ak hodi ajuda komunidade ne’ebé hala’o atividade hakarak rejistu maibé tanba hela dook,” Diretór Ezekutivu informa ba Agência Tatoli, iha ninia knaar fatin, Hudi-Laran, kinta ne’e.

Nia dehan, programa ne’e hetan resposta di’ak hosi komunidade tanba bele fasilita atividade negósiu.

“Rejistu móvel ne’e iha benefísiu hanesan fó reseita ba Estadu liuhosi rejista no benefísiu ba emprezáriu sira, bainhira rejistu tiha bele hetan sertifikadu no bele asesu ba garantia kréditu ne’ebé Governu prevee millaun $50, seguransa sosiál, no bele kompete iha programa Cesta Bázika,” nia hateten.

Notísia relevante: SERVE,I.P simu pedidu hosi nasaun tolu rekruta timor-oan

SERVE, I.P ho inisiativa hala’o atividade ne’e tanba komunidade maioria hela iha área rurál no bainhira atu mai vila la’o kilómetru 20 to’o 45, entaun Servisu Rejistrasaun mak tun hodi fasilita komunidade.

“Bainhira negosiante hala’o atividade negósiu maibé la rejista maka bele hetan multa tanba viola dekretu-lei SERVE, I.P ne’ebé deteta halo verifikasaun ba atividade fíziku no arkivu elektróniku, entidade sira viola lei númeru 10/2017 kona-ba sosiedade komunikasaun, dekretu-lei númeru 16/2017 kona-ba rejistu komersiál no dekretu-lei 34/2017 kona-ba lisensiamentu atividade ekonómika,” nia tenik.

Rejistu móvel ne’e foin hala’o semana ida iha munisípiu Manufahi, Liquiçá, Ainaro, Aileu Rejiaun Administrativa Espesiál Oé-cusse Ambeno (RAEOA).

“Atividade rejistu ne’e sei kontinua durante fulan-tolu, espera aumenta tan númeru rejistu. Kona-ba reseita ba rejistu móvel ne’e daudaun ita seidauk bele ko’alia sai tanba atividade sei la’o hela,” Florêncio salienta.

Empreza ne’ebé daudaun SERVE,I.P rejista hahú tinan 2013 to’o jullu 2022 hamutuk 39.162, ne’ebé hosi númeru ne’e barak liu timor-oan no reseita ne’ebé tama ba kofre Estadu  hamutuk $200.000.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!