iklan

EKONOMIA, HEADLINE

Kliente BNCTL 100.000 resin utiliza ona ATM P24

Kliente BNCTL 100.000 resin utiliza ona ATM P24

Diretór Ezekutivu BNCTL, Brígido de Sousa. Imajen Tatoli/Egas Cristóvão

DILI, 02 setembru 2022 (TATOLI)—Diretór Ezekutivu Banku Nasionál Timor-Leste (BNCTL, sigla portugés), Brígido de Sousa, hateten, daudaun ne’e kliente ne’ebé utiliza ona kartaun Automatic Teller Machine (ATM) P24 hamutuk 100.000 resin ona.

“Tinan kotuk ami husu imprime kartaun P24 100.000 hotu ona no tinan ne’e ami husu imprime tan 50.000, ne’ebé hahú distribui ba kliente sira ne’ebé hakarak,” Diretór Ezekutivu informa ba Agência Tatoli, iha ninia knaar fatin, Mandarin, sesta ne’e.

Mákina ATM BNCTL ne’ebé daudaun estabelese iha territóriu laran hamutuk 70, ne’ebé hosi númeru ne’e iha 20 mak adere ona ba rede P24, enkuantu mákina 50 mak seidauk adere ba fasilidade ne’e.

“ATM P24 ne’ebé iha Dili hamutuk iha fatin aulu hanesan iha Parlamentu Nasionál, Obrigado Barack, Mandarin, Areia Branca, Ministériu Finansa, Hospitál Nacional Guido Valadares (HNGV) nomós sira seluk,” nia akresenta.

Notísia relevante: Idozu besik 7.000 uza ona kartaun ATM hosi BNCTL

Enkuantu, ba munisípiu sira hanesan Bobonaro, Baucau, Manatuto, Viqueque no Ermera, kliente sira uza iha mákina ne’ebé BNCTL instala ho fasilidade P24 no orsamentu ne’ebé kada fulan tau iha ATM P24 hodi fasilita kliente nia trazasaun hamutuk millaun $3.

Aleinde ne’e, mákina foun sira presiza halo konfigurasaun atu nune’e bele adere ba sistema rede P24.

Tuir Jerente Banku Nasionál ne’e, ekipa BNCTL hamutuk ho Banku Sentrál Timor-Leste (BCTL, sigla portugés) halo hela esforsu nune’e bele konfigura hotu mákina ATM hodi adere hotu ba rede P24.

“Ami espera mákina ATM 50 ne’ebé seidauk adere ba P24 ne’e bele halo konfigurasaun hamutuk ho ekipa hosi BCTL no mós hosi ekipa téknika sira ne’ebé mai hosi fornesedór mákina ne’e hodi bele integra ona ba P24. Mákina sira la’os mákina P24 maibé mákina BNCTL nian ne’ebé mak adere ba rede P24. Mákina BNCTL nian nafatin, ATM P24 ne’e signifika mákina sira ne’e nafatin BNCTL nian no P24 ne’e hanesan rede de’it,” nia informa.

Maski nune’e, parte banku halo esforsu hotu nune’e kliente sira ne’ebé sei uza hela kartaun lokál BNCTL no hetan kartaun P24 nune’e bele uza fasilidade ne’e ho di’ak.

Iha sorin seluk, Diretór Ezekutivu Banku fó sai ba kliente sira, daudaun mákina balun ne’ebé integra ona ba P24, balun kliente sira bele kontinua uza nafatin kartaun lokál BNCTL nian halo tranzasaun maibé to’o tempu ida parte banku fó avizu utilizasaun kartaun ne’e rasik ka kartaun lokál ne’e la permite ona só bele uza de’it kartaun ne’ebé iha P24.

“Ida-ne’e akontese bainhira mákina BNCTL sira ne’e hotu integra ona ba P24. Ami espera sei akontese hotu iha fulan-setembru ka outubru tinan ne’e nia-laran,” nia dehan.

BNCTL mós halo ona intasaun sistema banku venda (POS, sigla portugés) iha loja sira territóriu laran hamutuk 125.

“Ami instala POS ne’e ba munisípiu sira ne’ebé liga ba rede P24, signifika kliente BNCTL nian ne’ebé kaer ATM P24 ne’e bele uza halo tranzasaun ba kompra. Ida-ne’e fasilita mós kliente banku sira seluk ne’ebé uza hotu ona ATM P24 ne’e mós bele uza hotu POS,” nia salienta.

Jornalista   : Arminda Fonseca

Editora        : Julia Chatarina

iklan
iklan

Leave a Reply

iklan
error: Content is protected !!