iklan

NASIONÁL, JUSTISA, HEADLINE

Komité 12 Novembru husu PNTL investiga ho profisionál ba kazu mate iha sela polísia

Komité 12 Novembru husu PNTL investiga ho profisionál ba kazu mate iha sela polísia

Prezidente Komité 12 Novembru, Gregório Saldanha “Mouris”. Imajen/espesiál

DILI, 02 setembru 2022 (TATOLI)—Prezidente Komité 12 Novembru, Gregório Saldanha “Mouris”, hateten populasaun Timor Leste liliu iha munisípiu Díli hakfodak no triste ho joven ida naran José Bernardo “Adriano” ne’ebé mate, kinta horiseik (01/09), ho kondisaun ida suspeitável iha sela PNTL Munisípiu Díli.

“Ita hotu seidauk hatene motivu sa mak halo joven ida ne’e mate. Nuné ita hotu hein rezultadu autópsia ho investigasaun ida kle’an no profesionál hosi PNTL, hodi deskobre saida maka halo nia mate. Maibé, evidénsia hatudu momós katak joven ne’e mate iha sela laran tanba fiu metan eletirisidade naruk ida kesi hela iha nia kakorok,” Prezidente Mouris hateten liuhosi nota ne’ebé Agência TATOLI, sesta ne’e.

Notísia relevante: Deskonfia suspeitu ida tara-aan iha sela detensaun Komandu PNTL Dili

Relasiona ho mate ne’e, Komité 12 novembru hato’o nia protesta maka’as tanba joven ne’e mate, iha intituisaun PNTL ne’ebé harii nu’udar rezultadu hosi nia aman hanesan ema 12 Novembru, ho povu Timor-Leste nia luta naruk no difísil iha tempu uluk.

Komité 12 novembru mós protesta no lamenta ba joven ne’e nia nia-mate tanba jovem ne’e mate iha instituisaun PNTL ne’ebé devia fó protesaun ba nia, la’ós kria kondisaun la di’ak iha sela laran hodi implika ba nia mate

“Joven ne’e nia mate hatudu katak PNTL iha Munisípiu Díli serbisu la profisionál, nune’e la garante bá membru populasaun sira ne’ebé detidu iha sela laran ho seguru,” nia afirma.

Nune’e, Prezidente Komité 12 Novembru husu bá Komandante Jerál PNTL atu halo suspensaun no investigasaun bá membru PNTL sira hotu ne’ebé, Kinta horisehik (01/09), hala’o serbisu iha Kuartél PNTL Munisípiu Díli, hodi asumi sira nia responsabilidade bá joven José Bernardo nian “Adriano” nia-mate.

Komité 12 Novembru mós tau nafatin fi’ar ba PNTL hodi hala’o nia serbisu ho profisionalizmu hodi fó protesaun ho domin ba ita nia Povu Timor Leste tomak, sein halo diskriminasaun ba ema ida, maske tuir léi sira halo sala ruma.

Notísia relevante: Komandu PNTL hahú forma ekipa investiga kazu tara-aan iha sela detensaun

Jornalista  : Natalino Costa

Editór          : Florencio Miranda Ximenes

iklan
iklan

Leave a Reply

iklan
error: Content is protected !!