DIILI, 04 Setembru 2022 (TATOLI)—Tribunál Distritál Dili (TDD), domingu ne’e, halo interogatóriu dahuluk ba arguidu FA, krime ilísitu ba droga ne’ebé iha relasaun ho arguidu na’in-sia (9) antes ne’e.
Notísia Relevante: MP submete ona pedidu rekursu kontra desizaun tribunál ba kazu droga
Durante prosesu interogatóriu dahuluk ne’e, MP promove arguidu FA ho krime ilisitu droga hosi lei númeru 2/2017 ne’ebé previstu iha artigu 7 konsumu ilísitu droga.
Perante prosesu julgamentu Ministeriu Publiku, alega arguidu FA ho medida koasaun prizaun preventiva, tanba faktu komprova katak iha indísiu forte arguidu FA envolve kazu krime ílísitu droga tanba arguidu rasik importa materiál droga mai Timor-Leste.
Hafoin rona tiha parte hotu, tribunál deside aplika medida koasaun prizaun preventiva ba arguidu tanba arguidu iha indísiu forte envolve diretamente ba kazu krime ilísitu.
Ho desizaun hosi tribunál ne’e, hanesan parte defeza arguidu FA nian, Estaqui Guturres, la aseita desizaun tribunál ne’ebé aplika medida koasaun prizaun preventiva ba nia kliente, tanba nia komete kazu hanesan ho arguidu na’in-sia (9) inklui na’in-rua (2) seluk tan, ne’ebé antes ne’e tribunál aplika ona medida koasaun Termu Identidade Rezidensia (TIR) no aprezentasaun periódika ba sira.
Tanba, tuir Estaqui, nia kliente FA rasik laiha prova hatudu arguidu FA rasik mak importa droga hosi li’ur mai, arguidu ne’e hanesan sidadaun Timor no nia feen ema Timor, nia só ba hela iha Austrália.
“Hanesan parte defeza ha’u la simu desizaun ida-ne’e tanba desizaun ida-ne’e kontradis ho disizaun ida primeiru ne’ebé tribunál aplika ba arguidu na’in sia,” defeza arguidu FA, Estaqui Guturres, hateten ba jornalista sira iha TDD, domingu ne’e.
Maibé tanba de’it arguidu na’in-rua foin daudaun ne’e nia deklarasaun, entaun polísia buska arguidu FA nia rezidénsia iha buska ne’e la hetan buat ida no laiha prova ruma, arguidu FA hanesan timoroan no emprezariu timoroan, nia hatama sasán maibé la’ós ho atividade krime ilísitu ba droga maibé tribunál aplika medida koasaun prizaun preventiva.
“Tanba ne’e, hanesan parte defeza la simu desizaun ne’e no sei halo rekursu kontra tribunál nia desizaun ne’ebé aplika medida koasaun prizaun preventiva ba nia kliente,” nia hateten.
Antes ne’e, arguidu FA ekipa konjunta kompostu hosi Polisia Sientifika Investigasaun Kriminál (PCIC, sigla portugés), Serbisu Informasaun Polísia (SIP), Serbisu Nasionál Intelejensia (SNI) no Serbisu Informasaun Militár (SIM/ J2), halo detensaun, apreensaun no buska dómisiliáriu ba suspeitu ho inisiál FA iha nia rezidensia Metiaut, postu administrativu Cristo Rei, munisípiu Dili, tanba iha indísiu forte iha ligasaun ho arguidu na’in-sia (9) ne’ebé antes ne’e envolve iha kazu krime ilísitu droga.
Ekipa konjunta halo detensaun, apreensaun no buska domisiliariu ba suspeitu inisiál FA iha nia rezidensia Metiaut bazea ba mandadu hosi tribunál.
Detensaun, apreensaun no buska domisiliariu ne’ebé mak ekipa konjuntu halo ba iha suspeitu FA nia rezidensia Metiaut la’o durante oras tolu nia laran, hahú hosi tuku 11h00 dadeer to’o tuku 14h00.
Enkuantu iha prosesu detensaun, apreensaun no buska domisiliáriu ba suspeitu nia rezidénsia Metiaut suspeitu FA koopera ho parte PCIC hodi autoriza ekipa halo buska ba iha sasán sira hotu ne’ebé iha kontentór laran ne’ebé suspeitu rasik importa hosi rai-li’ur.
Aleinde ida-ne’e, ekipa konjunta ne’ebé lideradu hosi PCIC kontinua halo buska no apreensaun ba iha suspeitu FA nia uma iha área Taibesi, hodi kontinua halo buska no halo apreensaun hodi rekolla evidénsia balun tán, ho suspeitu nia hahalok hanesan iha artigu 7 hosi lei númeiru 2/2017 kosumu ilísitu droga.
Entertantu, tuir observasaun TATOLI iha terenu nota katak ekipa konjunta loke kedas suspeitu FA hodi detein iha sela PCIC Caicoli, nune’e kumpre oras 72 molok submete ba Interogatóriu dahuluk iha Tribunál Distritál Dili (TDD).
Durante ekipa konjunta halo detensaun, apreensaun no buska iha prosesu suspeitu nia rezidénsia hetan akompañamentu hosi suspeitu nia defensór privadu, Estaqui Guterres.
Entertantu familia hosi arguidu FA liu-liu nia feen no familia seluk ne’ebé mak loron tomak akompaña arguidu iha julgamentu iha Tribunál Distritál, ho matan-been hakuak arguidu hodi tanis.
Hafaoin desizaun ikus TDD nia ba arguidu FA akompana hosi PCIC transporta kedan arguidu ba prizaun Becora hodi medida koasaun prizasaun preventiva ne’ebé Tribunál Distritál Dili fó ba arguidu.
Audiénsia julgamentu ne’e prezide hosi Juis Singulár, Maria Solana, Ministeriu Públiku reprezenta hosi Prokuradór Domingos Goveia Leite no arguidu hetan asisténsia legál hosi Defensór Públiku, Estaqui Guterres.
Notísia Relevante: Kazu droga, membru PN preokupa TDD aplika TIR ba arguidu na’in-sia
Jornalista : Natalino Costa
Editór : Cancio Ximenes
