Top

AFTL prontu realiza liga futsal époka 2022-2023

Sekretariu Jeral Asosiasaun Futsal Timor -Leste (AFTL) Fernando Baptista Xavier. Imajen/Espesiál

DILI, 05 setembru 2022 (TATOLI)— Sekretáriu Jerál Asosiasan Futsal Timor-Leste, Fernando Baptista, informa daudaun sira nia parte hein desizaun Federasaun Futeból Timor – Leste (FFTL) nian, nune’e bele realiza liga futsal époka 2022-2023.

“Ami agora hein de’it, 07 setembru agora Ezekutivu FFTL foin enkontru hodi foti desizaun, maibé ami nia preparasaun la’o hela no ami prontu atu organiza liga époka ne’e,” dehan Fernando ba Agência TATOLI iha Aimutin-Dili, segunda ne’e.

AFTL mós submeter ona proposta orsamentu ho total $100.000 atu fasilita realizasaun liga ne’e, maibé depende ba kapasidade FFTL nian atu aprova hira. Tanba montante orsamentu ne’e mak sai kalkúlu hosi AFTL halo atu finánsia ba atividade liga nian durante tinan tomak.

“Osan ne’ebé ami propoin atu finansia ba atividade liga hosi klube primeira no segunda divizaun no super tasa nian mak ho total $100.000 ne’e,” nia afirma.

AFTL bele hala’o liga ona tanba iha tinan kotuk realiza ona pra-liga durante tinan tomak no iha klube hamutuk 24, hosi númeru ne’e, klube 10 mak konsege utrapasa ba primeira divizaun no klube 14 iha segunda divizaun.

Klube hirak ne’ebé iha direitu absoluta partisipa iha Liga Futsál 2022 iha jogu primeira divizaun hanesan, Ramelau FC, Mushila FC, Mauputar FC, Becusse United, Boa Sorte FC, São Francisco FC, Caesardante FC, AD Samoro, Gamer FC no Jerman FC.

Enkuantu, klube sira iha segunda divizaun hanesan, Coelho FC, Bermeta FC, M-VDL, Santa Cruz FC, Maudoko FC, Boavista FC Timor, Kuda Ulun FC, Crazy Horse, FIEL FC, Estrela Baguia FC, Baucau All Star, B’Tal FC, Kablaki FC no Academica FC.

Jornalista: Hortencio Sanchez

Editór       : Florencio Miranda Ximenes

Publisidade

Leave a Reply

Latest Post

error: Content is protected !!