iklan

DILI, HEADLINE, MUNISÍPIU

Sarani Bidau entuziasmu simu Dom Virgílio Kardeál do Carmo iha Lecidere

Sarani Bidau entuziasmu simu Dom Virgílio Kardeál do Carmo iha Lecidere

Sarani Katólika iha Suku Bidau, halibur malu ho antuziazmu simu Eminénsia Don Virgílio Kardeál  do Carmo da Silva, iha nia-rezidénsia Episkopál-Lecidere, Imajen/TATOLI

DILI, 05 setembru 2022 (TATOLI)—Sarani Katólika iha suku Bidau, halibur malu ho entuziasmu simu Eminénsia Dom Virgílio Kardeál  do Carmo da Silva, SDB, iha nia-rezidénsia Episkopál-Lecidere.

Dom Virgílio Kardeál, fila hikas mai Timor-Leste iha segunda, tuku 6:30, dadeer. Hafoin to’o iha aeroportu Prezidente Nicolau Lobato Dili, hala’o konferénsia imprensa no kontinua viajen hamutuk ho Prezidente Repúblika, José Ramos Horta, no Bispu Dioseza Maliana, Dom Norberto Da Silva, mai reza no fó bensaun ba sarani sira iha igreja katedrál-Dili.

Notísia relevante:  Kardeál Virgílio: “Ksolok ne’e la’ós ba ha’u maibé ba igreja no povu TL”

Ho nune’e, sarani sira husi suku Bidau-Lecidere mós hakarak hatudu sira-nia sentimentu alegria ba Kardeál, kompostu hosi kapela haat mak hanesan, Bidau Mota-klaran, Bidau Akadiru-hun, Bidau Lecidere, Gricenfor.

Sua Eminência Cardéal Dom Virgílio do Carmo da Silva. bainhira to aeroportu prezidente Nicolao Lobato komoro Dili, Imajen Tatoli/António Daciparu

Biban ne’e, sarani  Bidau-Lecidere, Guilhermina da Silva (49),  kontente tebes simu Eminénsia Virgílio Kardeál iha nia-rezidénsia, tanba Timor-Leste iha ona Kardeál foun no nu’udar bibi-atan ba igreja Katólika.

“Ha’u sente orgullu no  kontente tebes tanba foin dahuluk Timor-Leste iha éra ukun-an bele iha ona timoroan ida ne’ebé hetan títulu hanesan Kardeál atu sai bibi-atan ba igreja Katólika iha ita nia rain,” katak Guilhermina da Silva, ba Agência TATOLI iha rezidénsia Dom Virgílio Kardeál, segunda ne’e.

Nia dehan, sarani sira ne’ebé simu Eminénsia Kardéal ne’e mai hosi reprezentante kapela haat iha área Bidau nian.

“Ami ekipa bairru Bidau-Lecidere prepara simu Kardeál  iha estrada  ibun hodi akompãna Kardeál tama nia-rezidénsia ho dansa no kultura ne’ebé sei aprezenta hosi bairru Bidau nu’udar simbolu domin sira-nian ba Kardeál foun no nu’udar sarani Katólika.

Iha biban hanesan, Padre Paulus Maia, reforsa sarani ka komunidade ninia preparasaun ne’e mai hosi inisiátiva rasik hodi simu Kardeál foun ho domin.

“Atividade ida ne’e uluk liu sira hotu ne’ebé serbisu iha Camara Eclesiástica Arkeodioseze Dili nian, sira hakarak hatudu sira-nia ksolok, sira-nia apresiasaun, sira ninia kongratulasaun ba Dom Virgílio Kardeál ne’ebé foin lalais ne’e simu investidura iha vatikanu hanesan kardeal”, padre ne’e salienta.

Nia mós hateten sarani sira ne’ebé marka ona prezensa iha fatin ida ne’e kompostu husi kapela haat iha Lecidere. Atividade balun ne’ebé komunidade hala’o iha rezidénsia Kardeál mak dadolin, tara tais, hatudu sira-nia dansa tradisionál hodi akompaña Kardeál tama ba rezidénsia, ne’ebé sei simu husi empregadu sira ne’ebé serbisu iha ne’e.

Entretantu, Lirio de São José da Silva Lay nu’udar seminarista ne’ebé hamriik ho nia belun sira iha portaun bo’ot rezidénsia Kardeál no kaer bandeira RDTL hodi hein prezensa Kardeál sente kontente tanba ba nia loron ruma Maromak tulun sira mós sei liuhusi dalan refere.

“Ami sente kontente liuliu mai seminarista oan sira ne’ebé iha futuru sei iha dalan ba ne’ebá, atu sai saserdote ida ne’e mós nu’udar esperiénsia no preparasaun ida oinsá banati tuir Kardeál nia hodi loron ruma Maromak bolu atu sai saserdote,”  nia afirma.

Jornalista:  Natalino Costa

Editór        : Florencio Miranda Ximenes

iklan
iklan

Leave a Reply

iklan
error: Content is protected !!